. اسلام آباد۔7اپریل (اے پی پی) سرائیکی نہ صرف پورے ملک دے وکھو وکھ علاقیاں اچ بولی تے سمجھی ویندی اے جڈاں جو باہرلے ملکاں اچ وی سرائیکی بولنڑ آلیاں دی وڈی تعداد وسدی اے ۔ 1962 توں پہلے سرائیکی کوں علاقائی ناویں نال جوڑیا ویندا ہا جیویں ملتان اچ ملتانی ، بہاولپور اچ بہاولپوری تے اینکوں ریاستی وی آکھدے ہن ، جھنگ اچ جھنگوی ، جانگلی ، ڄاٹکی ، دیرہ اسماعیل خان اچ ڈیرِہ وال ، ڈیروی وغیرہ . ایں ٻولی تے تحقیقات تاں ڈھڳ عرصے کنوں تھیندی پئی ہئی 1957 ءچ ماء ٻولی ٻولݨ والے سارے سُڄاک مُہاندرے دانشور ، ادیب ، محقق کٹھے تھے ایں ماء ٻولی کوں ہکو ناں ݙیوݨ کیتے ڳالھ مہاڑ تھئی . میرحسان الحیدری دا آکھنڑ اے جو 1962 توں پہلےکتھائیں سرائیکی لکھنڑ ثابت نی تھیا جڈاں جو متفقہ منظوری دے بعد وی کئی عرصےتئیں سرائیکی نہ لکھیا ویندا ہا ۔ ہک رسالہ جیڑھا سید سید علی شاہ ملتانی نے 1949 اچ “پنجند” دے ناں نال کڈھیا ہا جیندے اچ او ملتانی لکھدے ہن ۔انھاں دا آکھنڑ ہا جو ناں رکھنڑ سانگے ہک کمیٹی بنڑائی گئی جیندے اچ غلام قاسم خاکوانی ، ریاض انور ایڈووکیٹ ، اخترعلی خان، مولانا نور احمد فریدی ، ڈاکٹر مہر عبدالحق ، سیٹھ عبیدالرحمٰن ، علامہ نسیم طالوت ، میرحسان الحیدری ، ارشد ملتانی تے ٻئے ݙھیر سارے مُہاندرے شامل ہن اکثریت “سرائیکی” دے ناں تے متفق تھی گئی تے صادق آباد ،مظفر گڑھ، ملتان ،میانوالی ، بھکر ، بہاولپور ، دیرہ غازی خان ، رحیم یارخان دیرہ اسماعیل خان ، ٹانک سمیت پورے خطے اچ ٻولݨ آلی ایں بولی کوں ایندے علاقائی لہجیں دے ناں مکا تے “سرائیکی” رکھ ڈتا گیا۔
