اسلام آباد۔12مئی (اے پی پی):قومی اسمبلی ھک متفقہ قرارداد دی منظوری ݙتی اے جیں اچ مقبوضہ جموں و کشمیر اچ انتخابی حد بندی کمیشن رپورٹ کوں مسترد کریندے ہوئیں شدید الفاظ اچ مذمت کیتی ڳئی اے تے آکھیا ڳئے جو انہاں حد بندیاں دے نتیجے اچ کوئی الیکشن اقوام متحدہ دے زیر انتظام آزادانہ اتے غیر جانبدارانہ استصواب رائے دا متبادل نی تھی سڳدا ، پاکستان کشمیریاں دے حق خودارادیت گھنݨ کیتے ہر ممکن کوشش جاری رکھیسی ، حکومت تے زور ݙتا ڳئے جو کشمیریاں دے خلاف بھارتی اقدامات کوں پرزور طریقے نال اقوام متحدہ ، او آئی سی سودھے عالمی برادری دے سامݨے بے نقاب کرے۔ قومی اسمبلی اچ وزیر خارجہ بلاول بھٹو زرداری قرارداد پیش کریندے ہوئیں آکھیے جو اے ایوان بھارت دی طرفوں حد بندی کمیشن دے ذریعے کیتی ونڄݨ آلی جغرافیائی تبدیلیاں دی شدید الفاظ اچ مذمت کریندے ۔ قرارداد اچ آکھیا ڳئے جو ایں اقدام دا مقصد مصنوعی طریقے نال مسلمان آبادی دی اکثریت کوں بدالݨا اے ۔ انہاں آکھیے جو ایں کمیشن دی تجویز کوں بھارتی مقبوضہ جموں و کشمیر اچ ساریاں سیاسی جماعتاں مسترد کرݙتے تے اساں وی ایں قرارداد دے ذریعے نام نہاد حد بندی کمیشن رپورٹ کوں مسترد کریندوں ۔
