اسلام آباد۔8جولائی (اے پی پی):صدرمملکت ڈاکٹر عارف علوی گرین پریذیڈنسی منصوبے دے تحت بجلی، پاݨی تے گیس دی بچت دے اقدامات تے اطمینان دا اظہار کیتے ۔ایوان صدر دے پریس ونگ توں جاری بیان اچ آکھیے صدرمملکت عارف علوی دی زیرصدارت ایوانِ صدر اچ بجلی دی بچت دے حوالے نال اجلاس تھیا۔اجلاس اچ ݙسایا ڳئے جو ایوانِ صدر توانائی دی مداچ گزریل ݙو سال اچ 10 کروڑ 80لکھ روپے دی بچت کیتی۔صدرمملکت عارف علوی آکھیے ایوانِ صدر دا گرین منصوبہ پورے ملک کیتے ھک بہترین مثال اے ، ایوانِ صدر مکمل طور تے 1 میگا واٹ دے شمسی توانائی دے منصوبے تے چلدا پئے ، ایوانِ صدر آپݨیاں ضرورتاں پوریاں کرݨ دے علاوہ 1 لکھ 12 ہزار یونٹس قومی گرڈ اچ ݙتن ، ایوانِ صدر دنیا دے پہلے آئی ایس او 50001سند شدہ صدارتی دفتر دے طور تے بین الاقوامی شناخت حاصل کیتی، توانائی دے مسئلیں تے موسمیاتی تبدیلی دے خطرناک اثرات نال نبݨݨ کیتے ساریں کوں آپݨا آپݨا کردار ادا کرݨا ہوسی ۔
