مکہ مکرمہ۔8جولائی (اے پی پی)پوری دنیا توں آئے لکھاں فرزندان اسلام فریضہ حج دی سعادت حاصل کیتی، میدانِ عرفات اچ مسیت نمرہ اچ رابطہ عالم اسلامی دے سیکرٹری جنرل ڈاکٹر شیخ محمد بن عبدالکریم العیسی خطبہ حج ݙتا۔ انہاں خطبہ حج اچ آکھیے جو اللہ دے سوا کوئی معبود کائنی، محمدﷺ اللہ دے آخری رسول تے بندے ہن، آپ ﷺدے بعد نبوت داسلسلہ بند تھی ڳئے ۔ انہاں خطبہ حج اچ آکھیے جو اسلامی اقدار دا تقاضا اے جیڑھی چیز نفرت دا باعث بݨے ایں توں پرے تھی ونڄو ، اللہ تعالی توں ݙرن اچ ہی کامیابی اے، تقوٰی اختیار کرݨ آلا اللہ تعالی دا قرب حاصل کریندے ، آپ دی مصیبت اللہ تعالی دے سوا کوئی پرے نی کرسڳدا ، نیکی کرݨ اچ ہمیشہ جلدی کرو، نبی کریمﷺ فرمایا جو قیامت دے ݙینھ میݙے نیڑے او لوک ہوسن جنہاں دا اخلاق چنڳاں ہوسی ، مسلمانو روزے رکھو، زکوٰة ݙیو تے نماز پڑھو ، اللہ تعالی وحدہ لاشریک اے اوں دے سوا کوئی معبود کائنی ، انہاں دی عبادت کرݨی چاہیدی اے ، اللہ تعالی توں ݙردے رہو آپݨٰی نمازاں دی حفاظت کرو۔ شیخ محمد بن عبدالکریم خطبہ حج اچ آکھیے جو سارے مسلمان آپت اچ بھرا بھرا ہن ، انہاں کوں چاہیدے جو آپت اچ اخوت نال رہن، امت مسلمہ کوں ایں ویلھے اتفاق تے اتحاد دی لوڑھ اے، نیکی دے کماں اچ پہل کرو تے برائی توں بچو، ہربندہ اے ڄاݨ گھنے جو اللہ تعالی وحدہ لا شریک اے، ایندے سوا کوئی معبود کائںی تے او ہرچیز تے قادر اے، ایندی عبادت کرݨی چاہیدی اے۔ ڈاکٹر محمد بن عبدالکریم العیسی خطبہ حج اچ آکھیے جیڑھا بندہ استطاعت رکھیندا ہووے او حج کرے ، معاشرے دے کمزور طبقیں دی کفالت دی ذمہ واری گھنے، اپݨے والدین، ازواج اتے ٻالاں دے نال چنڳاں سلوک کرے۔ انہاں آکھیے اللہ تعالیٰ دی رحمت احسان کرݨ آلیں دے نیڑے ہے ، نبی کریمﷺ ہمیشہ عاجزی اتے انکساری داحکم ݙتا۔ انہاں آکھیے عاجزی تے انکساری اللہ تعالی کوں ٻہوں پسند اے ، ہربندہ اے ڄاݨ گھنے جو ٻہوں تھوڑے وقت توں بعد اساں اللہ دے سامݨے حاضر تھیوݨا اے تے تے اوں ہر بندے توں اعمال متعلق جواب گھنݨا اے۔ انہاں آکھیے اساکوں تقوی اختیارکرݨا چاہیدے ، متقی لوک اللہ تعالی دے نیڑے ہوندن ، انہاں خطبہ حج اچ آکھیے وج اللہ تعالی توں ݙرݨ اچ ہی کامیابی اے ، اللہ فرمائے متقی کیتے جنت دی خوشخبری اے۔ انہاں آکھیے اسلامی اقدار دا تقاضہ اے جو جیڑھی چیز نفرت دا باعث بݨے اوں توں پرے تھی ونڄو ، نبی کریمﷺ فرمایا جو قیامت دے ݙینھ میݙے نیڑے او ہوسی جیں دا اخلاق چنڳاں اے ، آپ دی مصیبت اللہ دے سوا تے کوئی پرے نی کرسڳدا حج دے رکن اعظم وقوف عرفات دے دوران حجاج کرام مسیت نمرہ تے میدان عرفات دے ٻئے سارے حصیں اچ ظہر تے عصر دیاں نمازاں کٹھے پڑھیاں ، ایں موقع تے رقت آمیز مناظر ݙیکھݨ اچ آئے، دنیا دے مختلف ملکاں توں آئے لکھاں حجاج کرام رو رو تے اللہ تعالی توں مغفرت تے انہاں دے فضل و کرم دی دعا کیتی۔ غروب آفتاب ویلھے حجاج مزدلفہ روانہ تھی ویسن جتھاں او مغرب تے عشا دیاں نمازاں کٹھیاں پڑھسن تے رات کھلے آسمان تلے گزریسن اتے رمی کیتے کنکریاں جمع کریسن۔ حجاج کرام (اڄ) 10 ذی الحجہ کوں منی پڄسن تے شیطان کوں وٹے مریسن ، قربانی تے حلق دے بعد او احرام کھول ݙیسن تے طواف زیارت کیتے حرم شریف ویسن ۔
