اسلام آباد۔11جولائی (اے پی پی):وزیر اعظم محمد شہباز شریف کویت دے وزیراعظم عزت مآب شیخ صباح خالد الحمد الصباح نال ٹیلی فونک ڳالھ مہاڑ کیتی ، وزیراعظم عیدالاضحیٰ دے پرمسرت موقع تے کویت دی قیادت، حکومت تے عوام کوں مبارخ ݙتی ۔ وزیراعظم آفس دے میڈیا ونگ توں جاری بیان موجب کویتی وزیراعظم عید دی پرتپاک مبارخ ݙیندے ہوئیں ایں پرمسرت موقع تے پاکستان دی حکومت تے عوام کیتے نیک تمناواں دا اظہار کیتا ۔ پاکستان تے کویت دے درمیان برادرانہ تعلقات دا اعادہ کریندے ہوئیں وزیراعظم سانجھی دلچسپی دے مختلف شعبیں بالخصوص تجارت تے سرمایہ کاری اچ تعاون کوں مضبوط بݨاوݨ دے عزم دا اظہار کیتے ۔ وزیراعظم کویت اچ پاکستانی کمیونٹی دی چنڳی ݙیکھ بھال کرݨ تے کویت دی قیادت تے عوام داشکریہ ادا کیتے ۔
