پاکستان کشمیریوں دی جدوجہد آزادی دی سیاسی،سفارتی اتے اخلاقی حمایت کریندا رہسی، وزیر دفاع دا ریلی توں خطاب

اسلام آباد۔5اگست  (اے پی پی) وزیر دفاع خواجہ آصف اتے مشیر امور کشمیر وگلگت بلتستان قمرزمان کائرہ آکھیا جو پاکستان کشمیریوں دی جدوجہد آزادی دی سیاسی،سفارتی اتے اخلاقی حمایت کریندا رہسی۔ او بھارت ولوں مقبوضہ کشمیر دی خصوصی حیثیت کوں ختم کرݨ دے ترائے سال پورے تھیوݨ تے جمعے کوں فارن آفس توں ڈی چوک تئیں کݙھی ڳئی ریلی توں خطاب کریندے پئے ہن۔ وزیردفاع آکھیا جو اساں آپݨی نینگر نسل کوں کشمیر دے پاکستان نال رشتہ اتے اوندی اہمیت بارے ݙساوݨے۔ پاکستان دی ہر ڄاہ تے اڄ مظاہرے تھیندے پئن پر اے کافی کائنی۔ انہاں آکھیا جو کشمیر کاز کیتے اساݙی فوج جنڳاں لڑین، او ورکنگ باؤنڈری اتے ایل او سی تے پہرہ ݙیندے پئن۔ انہاں کوں خراج تحسین پیش کریندوں۔ ایں موقع تے وزیر اعظم دے مشیر برائےامور کشمیر و گلگت بلتستان  قمر زمان کائرہ آکھیا جو اے ریلی ایجھے ڳھناؤنے ݙینھ کوں مناوݨ کیتے اے جیڑھی ستر سالہ جبر نال بھرپور اے۔ اساکوں اقوام عالم کوں جھنجوڑ تے ولا ولا اے مقدمہ پیش کرݨے۔ ایں موقع تے حریت قیادت،سیکرٹری خارجہ سہیل محمود وی موجود ہن ۔