وفاقی حکومت متاثرین دی مدد کیتے ہر ویلھے موجود اے، بارشاں اتے سیلاب پاروں اموات تے معاوضے دی رقم فوری ݙتی ویندی پئی اے، وزیرِ اعظم شہباز شریف

ڈیرہ غازی خان ۔5اگست  (اے پی پی) وزیرِ اعظم شہباز شریف آکھیا جو  وفاقی حکومت متاثرین دی مدد کیتے ہر ویلھے موجود اے، بارشاں اتے سیلاب پاروں اموات تے معاوضے دی رقم فوری ݙتی ویندی پئی اے۔ ،چیف سیکرٹری متاثرین دی جائز ضروریات پوری کرن۔ جمعے کوں وزیراعظم ڈیرہ غازی خان، راجن پور اتے لسبیلہ دے سیلاب زدہ علاقیاں دا دورہ کیتا۔ وزیراعظم شہباز شریف دے ڈیرہ غازی خان پڄݨ تے انہاں کوں سیلاب نال تھیوݨ آلے نقصان ،ریلیف اتے بحالی دے اقدامات بارے بریفنگ ݙتی ڳئی۔ ایں موقع تے وزیراعظم آکھیا جو سیلاب اتے بارشاں پاروں تھیوݨ آلے ضیان اموات تے معاوضے دی رقم فوری ݙتی ویندی پئی اے۔ فصلاں اتے گھراں دے تھیوݨ آلے ضیان بارے سروے کریسوں۔ ایں بارے این ڈی ایم اے اتے پی ڈی ایم دے کوں ہدایت ݙے ݙتی اے اتے فوج دے تعاون کیتے آرمی چیف نال ڳالھ تھئی اے او وی تعاون کریسن۔ ایں سروے دا مقصد اے ھے جو حق دار کوں اوندا حق ملے اتے کوئی حق دار ایں توں محروم نہ رہوے۔ انہاں آکھیا جو سیلاب متاثرین دی بحالی کیتے صوبائی حکومتاں نال تعاون کریسوں۔ بریفنگ اچ وزیراعظم  چیف سیکرٹری پنجاب کوں ہدایت کیتی جو او متاثرین دے جائز مطالبے حل کرن۔ ایں موقع تے وفاقی وزیرِ اطلاعات و نشریات مریم اورنگزیب، معاونِ خصوصی عطاء اللہ تار ڑ، رکنِ قومی اسمبلی سردار ریاض محمود خان مزاری، اسلم بھوتانی اتے چیئرمین این ڈی ایم اے لیفٹیننٹ جنرل اختر نواز وی نال ہن۔