بھارت مقبوضہ کشمیر اچ آبادیاتی تبدیلیاں کوں اڳوں ودھاوݨ کیتے آپݨے مذموم منصوبیاں تے عمل کریندا پئے۔ وزیر خارجہ بلاول بھٹو زرداری دا سنیھا

اسلام آباد۔5اگست  (اے پی پی) وزیر خارجہ بلاول بھٹو زرداری آکھیا جو بھارت پنج اگست 2019 کوں بین الاقوامی سطح تے منیے ہوئے کشمیر دی متنازعہ حیثیت کوں بدلݨ اتے آپݨے غیر قانونی قبضے اچ جموں تے کشمیر دے آبادیاتی ڈھانچے کوں بدلݨ کیتے غیر قانونی اتے ہک پاسہ اقدامات کیتن۔  یوم استحصال دے موقع تے آپݨے سنیھے اچ انہاں آکھیا جو ترائے سالیں اچ تھیوݨ آلی پیش رفت اے ڳالھ نشابر کر ݙتی اے جو بھارت مقبوضہ کشمیر اچ آبادیاتی تبدلیاں کوں اڳوں ودھاوݨ دے آپݨے منصوبیاں تے مسلسل عمل کریندا پئے۔ انہاں آکھیا جو اے اقدامات اقوام متحدہ دی سلامتی کونسل دی قرارداداں اتے چوتھے جنیوا کنونشن سودھے سارے بین الاقوامی قانون دی خلاف ورزی اے اتے اے کشمیرایں دے انڄ تشخص کوں ختم کرݨ دی بھارتی کوشش دے سوا کجھ کائنی۔  وزیر خارجہ بلاول بھٹو زرداری آکھیا جو 5 اگست 2019 توں ہݨ تئیں 650 توں ودھ کشمیری شہید تھی ڳئن۔ ایں سال 130 توں ودھ کشمیری شہید کیتے ڳئن ۔ انہاں آکھیا جو کشمیری صحافیاں اتے انسانی حقوق دے محافظاں نال بھارت دے قابل مذمت سلوک نشابر کر ݙتے جو بھارت آپݨے ناجائز قبضے کوں برقرار رکھݨ کیتے کہیں وی حد تئیں ونجݨ توں نہ ہٹکسی۔ وزیر خارجہ بلاول بھٹو زرداری آکھیا جو بین الاقوامی برادری کوں مقبوضہ کشمیر اچ بھارت دی انسانی حقوق دی سنگین اتے وݙے پیمانے تے خلاف ورزیاں کوں ختم کرݨ، پنج اگست 2019ء دے ہک پاسہ اتے غیر قانونی اقدامات دی واپسی، سخت قوانین دی منسوخی اتے جموں تے کشمیر بارے اقوام متحدہ دی سلامتی کونسل دی قرارداداں تے عمل دا مطالبہ کرݨا چاہیدے۔ پاکستان اقوام متحدہ دی سلامتی کونسل دی متعلقہ قرارداداں اتے کشمیری عوام دی خواہشات دے مطابق جموں تے کشمیر دے تنازعہ دا پرامن حل چاہندے۔ پاکستان ایں منصفانہ مقصد اچ آپݨے کشمیری بھراواں دے جائز حقوق کیتے انہاں دی حمایت اتے یکجہتی کریندا رہسی۔