وزیر خارجہ بلاول بھٹو زرداری دا اسلامی تعاون تنظیم دے سیکرٹری جنرل حسین براہیم طحہ کوں خط ، بھارت دے غیر قانونی طور تے زیر قبضہ جموں تے کشمیردی سنگین صورتحال آلے پاسے توجہ ݙوائی

اسلام آباد۔5اگست  (اے پی پی) وزیر خارجہ بلاول بھٹو زرداری ، اسلامی تعاون تنظیم (او آئی سی) دے سیکرٹری جنرل حسین براہیم طحہ کوں ہک خط بھیجیا جئیں اچ انہاں بھارت دے غیر قانونی طور تے زیر قبضہ جموں تے کشمیردی سنگین صورتحال آلے پاسے توجہ ݙوائی۔ جمعے کوں دفتر خارجہ دے ترجمان ولوں جاری بیان موجب وزیرخارجہ او آئی سی دے سیکرٹری جنرل کوں خط اچ یاد ݙوایا جو بھارت پنج اگست 2019 کوں مقبوضہ کشمیر اچ وحشیانہ فوجی محاصرے اتے مقبوضہ علاقے دے لوکاں دی بنیادی آزادیاں تے سخت پابندیاں نال غیر قانونی اتے ہک پاسہ اقدامات کیتے ہن۔ انہاں اقدامات دے بعد غیر قانونی اقدامات کیتے ڳئے جئیں اچ غیر قانونی آبادیاتی تبدیلیاں اتے کشمیری قیادت دی قید اچ صورتحال اچ سنگین مظالم شامل ہن۔ وزیرخارجہ آکھیا جو مقبوضہ کشمیر اچ ماورائے عدالت قتل، جبری گمشدگیاں؛ غیر قانونی گرفتاریاں اتے فوجی آپریشنزدا سلسلہ جاری اے۔ وزیر خارجہ آکھیا جو ایں سال 23 مارچ کوں اسلام آباد اچ او آئی سی وزرائے خارجہ دی کونسل دے 48 ویں اجلاس اچ ”تنازعہ جموں و کشمیر “ دے عنوان نال منظور تھی قرارداد پنج اگست دے بھارتی غیر قانونی اتے ہک پاسہ اقدامات کوں مسترد کر ݙتا ہئی۔ وزیر خارجہ سیکرٹری جنرل تے زور ݙتا جو او کشمیری عوام دی قربانیاں اتے دلیرانہ کوششاں دی تاریخ دا احترام کریندیں ہوئیں او آئی سی دے پلیٹ فارم توں ٻئے اقدامات کر تے مقبوضہ کشمیر دے لوکاں دی انسانی لوڑھ کوں پورا کرݨ اچ مدد کرن اتے او آئی سی فیکٹ فائنڈنگ مشن مقبوضہ علاقے تئیں رسائی حاصل کرݨ دی کوشش کرے۔