عمران خان دا کوڑ کھل ڳئے، اے تکنیکی نئیں سیدھا فارن فنڈنگ دا کیس اے، وزیر اطلاعات مریم اورنگزیب

اسلام آباد۔6اگست(اے پی پی)وفاقی وزیر اطلاعات مریم اورنگزیب آکھیے جو ممنوعہ فنڈنگ کیس اچ سابق وزیراعظم عمران خان کوڑے کاغذ جمع کرائن، ہݨ ایکوں تکنیکی رنگ ݙتا ویندا پئے ٻھل اے ٹیکنکل نی سیدھا فارن فنڈنگ دا کیس اے۔ اسلام آباد اچ پریس کانفرنس کریندے انہاں آکھیا جو سیلاب پاروں ملک دے کئی حصے متاثر ہین، حکومت امداد و بحالی دے کم اچ ردھی ہوئی اے، این ڈی ایم اے، پی ڈی ایم ہر ممکن کم کریندے پن۔ انہاں آکھیا جو ہیلی کاپٹر حادثے تے منفی ٹرولنگ کیتی ڳئی جیڑھا عمران خان مائنڈ سیٹ دی تݙ تے تھیندے، سوشل میڈیا اتے اینڄھی نفرت انگیز مہم افسوسناک اے۔ مریم اورنگزیب آکھیا جو الیکشن کمیشن پہلی واری کہیں پارٹی دے سربراہ کوں فارن ایڈڈ پارٹی ڈکلیئر کیتے، اے 8 سال کیس روکی رہین، ہݨ فیصلہ آئے تاں ایکوں تیکھی دا فیصلہ آہدن، اے خیرات دا مال وی سیاست کیتے استعمال کیتی رہن، انہاں کوں سارا پتا ہا جو کیہڑا مال کتھو آندا پئے، عمران خان فارن ایجنٹ ہین جیں فارن فنڈنگ ڳھدی اے، تحریک انصاف فارن ایڈڈ پارٹی ڈکلیئر تھی گئی اے۔ 2008 توں بعد 2014ء اچ دھرنا فارن فنڈنگ نال تھئے اتے ملک اچ کوڑ، فراڈ اتے ملک دے خلاف مہم جوئی تھئی اے۔ وفاقی وزیر اطلاعات آکھیا جو انہاں کوں فنڈنگ دا ݙساوݨا پوسی، 2018 توں 2022ء تئیں فنڈنگ کتھاں استعمال تھئی اے، صادق و امین دی اصلیت سامݨے آچکی اے، پی ٹی آئی دا جرم الیکشن کمیشن، سٹیٹ بینک ثابت کیتے، انہاں دے آپݨے ملازم سچ ٻلیندے پن۔