وزیراعظم محمد شہباز شریف تے شیخ محمد بن زید النیہان وچال ٹیلی فونک رابطہ، سانجھی دلچسپی دے امور تے ڳالھ مہاڑ

اسلام آباد۔9اگست  (اے پی پی):وزیراعظم محمد شہباز شریف اتے متحدہ عرب امارات دے صدر شیخ محمد بن زید النیہان وچال ٹیلی فونک رابطہ تھئے جیں اچ ݙوہیں رہنماواں دلچسپی دے امور تے ڳالھ مہاڑ کیتی جݙاں جو ݙوہیں ملکاں وچال نیڑے بھرپی آلے تعلقات دا اعادہ کریندے ہوئیں مختلف شعبیں اچ ݙو پاسے تعاون مزید ودھاوݨ کیتے رل تے کم کرݨ تے اتفاق کیتے ۔ منڳل کوں وزیراعظم آفس میڈیا ونگ توں جاری پریس ریلیز موجب وزیراعظم متحدہ عرب امارات دے صدر نال ٹیلی فون تے ڳالھ مہاڑ کیتی ۔ وزیراعظم متحدہ عرب امارات اچ اڄوکے سیلاب دے نتیجے اچ پاکستانی شہریاں سمیت قیمتی جاناں دے ضیان تے افسوس تے ہمدردی دا اظہار کیتے۔ ایں موقع تے متحدہ عرب امارات دے صدر پاکستان اچ سیلاب توں تھیوݨ آلے جانی ضیان تے ہیلی کاپٹر حادثے اچ فوجی جواناں دی شہادت تے وی تعزیت کیتی ۔ وزیراعظم شہباز شریف دے اپریل 2022 اچ متحدہ عرب امارات دے دورہ دے دوران کیتے ڳئے فیصلیں کوں دہریندے ہوئیں ݙوہیں رہنماواں ایں تے تھیوݨ آلی پشرفت دا جائزہ ڳھدا تے سرمایہ کاری ، توانائی تے بنیادی ڈھانچہ دی تعمیر اچ شراکت داری سودھے تجارتی تے اقتصادی تعاون کوں مزید مضبوط بݨاوݨ دا عزم کیتے ۔ وزیراعظم متحدہ عرب امارات دی طرفوں پاکستان کوں کئی سالاں توں ݙتی ونڄݨ آلی معاونت کوں اجاگر کریندے ہوئیں آکھیے جو امارات دی طرفوں پاکستان اچ مختلف اقتصادی تے سرمایہ کاری دے شعبیں اچ ھک ارب ڈالر دی سرمایہ کاری دے اڄوکے اعلان دا خیرمقدم کریندوں، پاکستان تے متحدہ عرب امارات وچال نیڑے برادرانہ تعلقات ہن جنہاں دی جڑی مشترکہ اعتقاد، اقدار اتے ثقافت نال جڑیاں پئں ، متحدہ عرب امارات مشرق وسطیٰ اچ پاکستان دا ساریں توں وݙا تجارتی شراکتدار اتے سرمایہ کاری دا ذریعہ اے او 16 لکھ توں ودھ پاکستانیاں دی میزبانی کریندا پئے ۔