ڈائمنڈ جوبلی تقریبات ،تریمت ارکان پارلیمنٹ دے گروپ وومن کاکس دے زیر اہتمام تریمت کنونشن دا انعقاد

اسلام آباد۔12اگست (اے پی پی):یوم آزادی دے موقع تے پہلی دستور ساز اسمبلی دی ڈائمنڈ جوبلی تقریبات دے سلسلے اچ تریمت ارکان پارلیمنٹ دے گروپ وومن کاکس دے زیر اہتمام تریمت دا کنونشن جمعہ کوں قومی اسمبلی ہال اچ منعقد تھیا۔ سپیکر قومی اسمبلی راجہ پرویز اشرف صدارت کیتی ۔ کنونشن اچ موجودہ و سابق تریمت ارکان پارلیمنٹ،مختلف شعبہ ہائے زندگی توں تعلق رکھݨ آلیاں تریمتاں تے سکول کالج اتے یونیورسٹیاں دی طالبات شرکت کیتی ۔ کنونشن دا تھیم’’ مرکز یقین شاد باد‘‘ہئی اجلاس دے دوران کنونشن اچ شریک تریمتاں کوں قومی اسمبلی اچ تریمت ارکان پارلیمنٹ دے گروپ وومن کاکس دے حوالے نال ݙسیا ڳیا جو 2008 دے الیکشن دے بعد جݙاں ڈاکٹر فہمیدہ مرزا سپیکر بݨی تاں انہاں وومن کاکس دی بنیاد رکھی جیں دے مقصد اچ تریمتاں دے حقوق دے قانون سازی ، صنفی امتیاز دا خاتمہ اتے خواتین کوں معاشرے اچ مرداں دے برابر مساوی موقع دی فراہمی ہئی۔ ایں ضمن اچ مختلف ادوار اچ وومن کاکس ایں سلسلے اچ ہر قسم دی پارٹی وابستگیاں توں بالا تر تھی تے کم کیتا ۔ کنونشن دے آغاز تے سپیکر سارے شرکاء دا خیر مقدم کیتا تے آکھیے وج پاکستان دا یوم آزادی ساݙے وݙیں وی جدوجہد دی یاد ݙویندے ۔ ساݙیاں تریمتاں وی تحریک پاکستان توں تعمیر پاکستان تئیں محترمہ فاطمہ جناح ، بیگم رعنا لیاقت علی خان، بیگم نصرت بھٹو ، بیگم کلثوم تے محترمہ بے نظیر بھٹو سودھے ٻیاں تریمتاں دا کردار قابل ستائش اے ۔ پاکستان دیاں دھیریں آپݨے کردار توں وطن دا جھنڈا اچا کیتے ۔ وومن کاکس صنفی امتیاز مکاوݨ کیتے ٻہوں وݙا کردار ادا کیتے ۔ وومن کاکس دی سیکرٹری شاہدہ رحمانی آکھیے جو ڈائمنڈ جوبلی دے موقع تے ایں کنونشن دا انعقاد ٻہوں چنڳاں اے جیں کیتے اساں سپیکر دے شکر گزار ہیسے ۔ 75 سال بعد ایں ہال دے اندر جیڑھی عزت تے تکریم ݙتی ڳئی اے ایں نال ھک نویں تاریخ رقم تھئی اے ۔ تحریک پاکستان اچ محترمہ فاطمہ جناح ، شائستہ اکرام اللہ اتے تریمتاں جݙاں میدان عمل اچ آئیاں تاں حالات بدل ڳئن ۔ قیام پاکستان دے بعد محترمہ فاطمہ جناح کوں موقع ݙتا ویندا تاں ملک ݙو لخت نہ تھیندا۔ محترمہ بے نظیر بھٹو وی آمریت دے خلاف مزاحمت کیتی تے آپݨا کردار منوایا ۔ اوشہید جمہوریت ہن انہاں دا ناں امر تھی ڳیا ۔ تریمتاں ما بھیݨیں تے دھیریں ہن ایں کیتے تریمتاں نال امتیازی ورتاؤ نی تھیوݨاں چاہیدا ، قومی ترانہ ساݙی امنگاں دا ترجمان اے ۔ ۔ گلگت بلتستان توں سعدیہ دانش آکھیے جو حضرت خدیجۃ الکبریٰ اتے حضرت فاطمتہ الزہرا دی بے مثال جدوجہد اتے عظیم قربانیاں توں تاریخ رقم تھئی ۔ ایں طرح محترمہ فاطمہ جناح اتے تحریک پاکستان اچ شامل بیاں تریمتاں وݙے جگرے دا مظاہرہ کیتے۔ محترمہ نصرت بھٹو ، محترمہ بے نظیر بھٹو ملک اچ جمہوریت کیتے بے مثال جدوجہد کیتی ۔ انہاں ڈاکٹر رتھ فائو کوں وی خراج عقیدت پیش کیتے ۔ آزاد جموں و کشمیر دی سابقہ ڈپٹی سپیکر شاہین کوثر ڈار آکھیے جو تحریک آزادی کشمیر اچ لائن آف کنٹرول دے ݙوہیں پاسوں دیاں تریمتاں پاکستان دے پاسے ݙیکھدیاں پئن او آپݨے ٻالاں دیاں لاشاں چیندیاں پئن ، انہاں دیاں لازوال قربیاں ہن تے انہاں پاکستان نال آپݨا رشتہ قربانیاں ݙے تے نبھائے ۔ انہاں مطالبہ کیتے جو ساݙا معاشرہ جنس دے طور تے نی سرمایہ دے لحاظ نال ونڈیا ہویا اے ۔ تریمتاں کوں مالی لحاظ نال خود مختار بݨاوݨ دی لوڑھ اے ، آزاد کشمیر اچ تریمتاں دی ترقی کیتے وزیر ہی کائنی اساکوں ہر فورم تے نمائندگی ݙتی ونڄے ۔ سینیٹر روبینہ خالد آکھیے جو صوبہ خیبر پختونخوا تحریک پاکستان اچ نہ صرف قائد اعظم دا ساتھ ݙتا بلکہ جمہوریت دی بحالی کیتے آپݨا کردار ادا کیتے ، انہاں آکھیے ماضی وانڳوں صوبہ خیبر پختونخوا اچ او عناصر ول سر چیندے پئں اساکوں ھک واری ول انہاں نال قومی یک جہتی دے نال نبݨݨا ہوسی کیوں جو اے صورت حال کے پی اچ تریمتاں کیتے ٻہوں تشویشناک اے ۔ سندھ توں نمائندگی کریندے ہوئیں سینٹر رخسانہ زبیری آکھیے جو اسمبلیاں اچ تریمتاں دی تعداد اچ ودھارا خوش آئند اے ۔اساکوں یقین اے جو تریمتاں دی جدوجہد رنگ گھن آسی ، انہاں آکھیے بنگلہ دیش وانڳوں پاکستان اچ وی تریمتاں تے تیزاب سٹݨ آلیں کوں موت دی سزا رکھی ونڄے ۔ بلوچستان توں ثنا جمالی آکھیے جو ہم قائد اعظم محمد علی جناح دے شکر گزار ہیسے جنہاں دی جدوجہد توں پاکستان وجود اچ آئے تے اڄ اساں اتھاں ایوان اچ ٻیٹھوں ، محترمہ بے نظیر بھٹو انہاں ایواناں اچ اساں کیتے رستہ کھولیا ، انہاں مطالبہ کیتے جو بلوچستان اچ تعلیم دے ودھارے ، سیلاب متاثرین دی بحالی ،اتھاں خواتین دی ترقی کیتے وفاق ساݙا ساتھ ݙیوے ۔ صوبہ پنجاب توں نمائندگی کریندے ہوئیں رکن قومی اسمبلی شائستہ پرویز ملک آکھیے جو اللہ رب العزت پاکستان کوں ہمیشہ سازشاں تے نفرتاں توں محفوظ رکھے ۔ لوک خون دا سمندر پار کتے پاکستان آئے اساکوں ایں ملک دی قدر کرݨی چاہیدی اے تے ایندی ترقی کیتے آپݨا کردار ادا کرݨا چاہیدے ، انہاں آکھیے جو پاک فوج ، پولیس تے ہر ادارے پاکستان دی ترقی اچ کردار ادا کیتے ۔ سابق رکن اسمبلی نعیمہ کشور خان آکھیے جو قوانین تاں ٻہوں سارے بݨن اساکوں ایں تے عمل درآمد کراوݨ تے توجہ ݙیوݨی چاہیدی اے ، انہاں آکھیے سیاسی جماعتاں دے اندر وی جمہوریت گھن آوݨی ہوسی ، صوبہ کے پی اچ پہلی واری تریمتاں دہشت گردی دے خلاف نکلئن ساݙے علماء شہید تھیندے پئن۔ تنزیلہ مظہر آکھیے جو ایں ایوان کوں تریمتاں دے مسئلیں دے حل کیتے تقسیم نی تھیوݨا چاہیدا ۔ نزہت شیریں آکھیے جو ڈائمنڈ جوبلی دے موقع تے تریمتاں دے کنونشن دا انعقاد خوش آئند اے ۔ پاکستان اچ شادی دی گھٹ توں گھٹ عمر 18 سال کیتی ونڄے ۔ بلدیاتی نظام اچ تریمتاں دی شمولیت دا تناسب ودھایا ونڄے ۔ نرگس فیض ملک آکھیے جو آندے الیکشن اچ ساریاں سیاسی جماعتاں اے عہد کرن جو تریمتاں کوں سرمایہ دار دے طور تے نی وفاداری دی بنیاد تے ٹکٹ ݙتا ویسی ۔ عظمی سلطان آکھیے جو دماغ اچ بھری ڳئی گندگی دا علاج کرݨ دی لوڑھ اے ، قوانین ہووݨ دے باوجود تریمتاں کوں ہراساں کیتا ویندے ایں پاسے توجہ ݙتی ونڄے ۔ ایم کیو ایم دی رکن اسمبلی کشور زہرا آکھیے میݙی سنڄاݨ ھک مہاجر اے میں اتھاں انہاں دی نمائندہ ہم ، اساں پاکستان کوں بݨائے ۔ اساکوں نظر انداز نہ کیتا ونڄے ۔ شاہدہ رحمانی آکھیے میݙے وݙے وی پاکستان ہجرت کر تے آئے ہن ۔ مرکزی صوبائی اسمبلیاں دے انتخابات اتے بلدیاتی سطح تے تریمتاں کوں جنرل نشستاں تے 33 فیصد کوٹہ مختص کیتا ونڄے ۔ ٹرانس جینڈرز دی نمائندگی کریندے ہوئیں ببلی آکھیے اساکوں پہلی واری ایں ایوان اچ ڳالھ کرݨ دا موقع ایں ڳالھ دا ثبوت اے جو اساکوں شناخت ݙتی ڳئی اے جنہاں لوکاں ساݙا ساتھ ݙتے انہاں دے شکر گزار ہیسے ۔ ٹرانس جینڈر دے تحفظ دے حوالے نال قانون موجود اے ایں تے عمل کراوݨ دی لوڑھ اے ، انہاں مطالبہ کیتے جو ایں ایوان اچ تریمتاں وانگوں ٹرانس جینڈرز کیتے وی کوٹہ مختص کیتا ونڄے کیوں جو پاکستان ساݙا وی اے ۔ طاہرہ اورنگزیب سپیکر دا شکریہ ادا کریندے ہوئیں آکھیے جو انہاں ایں ایوان دے دروازے عام عورت کیتے کھولئن ، انہاں کنونشن اچ شریک ساریاں تریمتاں دا شکریہ ادا کیتے تے آکھیے جو نرگس فیض دا اے جملہ ٻہوں اعلی ہئی جو سیاسی جماعتاں کوں وفاداری دی بنیاد تے ٹکٹ ݙتے ونڄن تے ایں مطالبے دی ٹرانس جینڈرز کیتے سیٹ مختص کرݨ دی وی حمایت کریندی ہاں ۔ وجیہہ اکرم آکھیے جو عورت ما بھیݨ تے دھی اے ایندا تحفظ یقینی بݨایا ونڄے ۔ انہاں قرار داد پیش کریندے ہوئیں آکھیے جو تریمتاں دا اے کنونشن ڈائمنڈ جوبلی دے موقع تے تحریک پاکستان دی جدوجہد اچ کردار ادا کرݨ آلیاں تریمتاں کوں خراج عقیدت پیش کریندے ۔ اے کنومشن مطالبہ کریندے جو تریمتاں کوں قرآن و سنت دے مطابق حاصل حقوق دا تحفظ کیتا ونڄے ایں توں انڄ عالمی کنونشنز اتے قوانین دے تحت وی تریمتاں کوں جیڑھے حقوق حاصل ہن او وی یقینی بݨائے ونڄن ۔قرار داد دی اتفاق رائے نال منظوری ݙتی ڳئی ۔