پاکستانی پرچم ساݙے اتحاد دی علامت اے، اساں ھک ہیسے ، نفرت، ونڈ تے فساد کھنڈاوݨ دی ہر کوشش ناکام بݨیسوں ، ڈی چوک ہمیشہ احتجاج کیتے استعمال تھئے، اڄ اتھاں نینگر، ٻال تے پولیس اہلکار یوم آزادی منیندے پئن، مریم اورنگزیب

اسلام آباد۔13اگست (اے پی پی):وفاقی وزیر اطلاعات و نشریات مریم اورنگزیب پاکستان دی 75 ویں سالگرہ تے ملک اچ محبت اتے برداشت دے کلچر کوں ودھاوݨ دے عزم دا اظہار کریندے ہوئیں آکھیے جو پاکستانی پرچم ساݙے اتحاد دی علامت اے اساں سارے ھک ہیسے ،، نفرت، ونڈ تے فساد کھنڈاوݨ دی ہر کوشش ناکام بݨیسوں۔ اڄ پوری قوم پاکستان دی ڈائمنڈ جوبلی منیندی پئی اے ، ڈی چوک ہمیشہ احتجاج کیتے استعمال تھئے اڄ اتھاں نینگر ، ٻال تے پولیس اہلکار یوم آزادی منیندے پئن ، جݙاں وی ایں ملک اچ جمہوری دور آئے ترقی دے ثمرات عوام کوں ملدے رہیے ، ذوالفقار علی بھٹو ایں ملک کوں آئین ݙتا، نواز شریف ملک کوں ایٹمی طاقت بݨایا، ساریاں اکائیاں کوں کنیکٹیویٹی نال آپت اچ رلائے ، ملک کوں پہلی موٹر وے ݙتی ، ملک دی خاطر جاناں دا نذرانہ پیش کرݨ آلے مسلح افواج، پولیس اتے سیکورٹی اداریں دے اہلکاراں کوں خراج عقیدت پیش کریندوں ۔ ہفتے کوں اتھاں وزارت اطلاعات، سی ڈی اے اتے فیڈرل ڈائریکٹوریٹ آف ایجوکیشن دے اہتمام نال مختلف سکولاں دے ٻالاں ولوں قومی ہرچم دی پینٹنگ اتے ڈائمنڈ جوبلی فیسٹیول دی تقریب توں خطاب کریندے ہوئیں وفاقی وزیر اطلاعات آکھیے جو پاکستان دے نوجوان اڄ ملک دے نال یکجہتی دا اظہار کریندے پئن، مارچ پاسٹ کیتے پولیس دے دستے بھیجݨ تے وزیر داخلہ رانا ثناء اللہ، وزارت داخلہ، آئی جی پولیس اتے چارے صوبیں دا شکریہ ادا کریندوں ۔ انہاں آکھیے جو ملکی تاریخ اچ اے پہلا موقع تے جو چارے صوبیں دی پولیس دے دستے شاہراہ دستور تے پاکستان دی ڈائمنڈ جوبلی مناوݨ کیتے کٹھے تھئن ، انہاں آکھیے اڄ سکولاں دے ٻالاں قومی پرچم تیار کرݨ کیتے یکجہتی دا مظاہرہ کیتے ، اڄ ساݙے نینگر تے ٻال پاکستان کیتے مر مٹݨ کوں تیار ہن ، ایہو جذبہ 1947ء وچ ہئی ۔ انہاں آکھیے ملک دی 65 فیصد آبادی نینگراں دی اے، نینگر ایں ملک کیتے کہیں وی قربانی توں پچھوں نہ ہٹسن۔ وفاقی وزیر اطلاعات پاکستان دی مسلح افواج، پولیس تے سیکورٹی اداریں کوں خراج تحسین پیش کریندے ہوئیں مسلح افواج، پولیس تے سیکورٹی ادارے ݙینھ رات ساݙی حفاظت تے مامور ہن۔ انہاں آکھیے جو مسلح افواج، پولیس، رینجرز اتے ایف سی دے نینگر ملک دی خاطر آپݨیاں جاناں دے نذرانے پیش کیتے اڄ پوری قوم انہاں کوں خراج عقیدت پیش کریندی اے ۔ وفاقی وزیر اطلاعات آکھیے جو جݙاں وی ملک اچ جمہوری دور آئے ایندے ثمرات پاکستان دے عوام کوں ملیے ۔ انہاں آکھیے قائداعظم آکھیا ہئی جو جمہوریت اچ ایں مٹی دا مستقبل اے۔ وفاقی وزیر اطلاعات آکھیے جو شہید ذوالفقار علی بھٹو ایں ملک کوں آئین ݙتا، نواز شریف وفاق دیاں ساریاں اکائیاں کوں کنیکٹیویٹی دے ذریعے آپت اچ جوڑیے ، ملک کوں پہلی موٹر وے ݙتی، ذوالفقار علی بھٹو شہید دا شروع کیتا ڳیا ایٹمی پروگرام پایہ تکمیل کوں پڄایا ، انہاں آکھیے نواز شریف ہر دٻاؤ دے باوجود ملک دے دفاع کوں ناقابل تسخیر بݨائے ، ایٹمی پروگرام کوں کامیاب بݨاوݨ کیتے ڈاکٹر عبدالقدیر خان مرحوم سودھے سارے سائنسداناں تے انجینئرز کوں خراج تحسین پیش کریندوں ۔ مریم اورنگزیب آکھیے جو شہباز شریف صوبہ پنجاب کوں ملک دیاں ساریاں صوبائی اکائیاں نال جوڑیا ، انہاں آکھیے 2013ء توں 2018ء تئیں مسلم لیگ (ن) دے دور اچ نواز شریف ملک توں لوڈ شیڈنگ تے دہشت گردی دا خاتمہ کیتا، ملکی ترقی دی شرح کوں 6 فیصد تئیں پڄایا ، احتساب دے عمل دا اپݨی ذات توں آغاز کیٹا، اڄ 9 سال گذرݨ دے بعد وی جمہوری قیادت سرخرو تھئی ۔ انہاں آکھیے ایہے او ثمرات ہن جیڑھے کݙاہیں وی ایٹمی قوت، کݙاہیں آئین، کݙاہیں فور جی دی سہولت اتے کݙاہیں یوتھ پروگرام و بے نظیر انکم سپورٹ پروگرام دی صورت اچ عوام کوں جمہوری ادوار اچ ملیے ۔ وفاقی وزیر اطلاعات ݙسایا جو وزیراعظم شہباز شریف کل 14 اگست کوں ری ریکارڈڈ قومی ترانے دا افتتاح کریسن۔ وفاقی وزیر اطلاعات ایں موقع تے سکول دے ٻالاں نال رل تے پاکستان زندہ باد دے نعرے لاتے ۔ انہاں آکھیے جو وزارت اطلاعات ݙینھ رات محنت کرتے انہاں تقریبات دا اہتمام کیتے۔ انہاں پی ٹی وی، ریڈیو پاکستان سودھے وزارت اطلاعات دے سارے ادایں ، سی ڈی اے، فیڈرل ڈائریکٹوریٹ آف ایجوکیشن اتے وزارت داخلہ کوں مبارخ ݙتی ۔ وفاقی وزیر اطلاعات آکھیے جو اڄ رات 12 وڄے اتھاں آتش بازی دا مظاہرہ تھیسی جیڑھا جو پی ٹی وی تے لائیو ٹیلی کاسٹ تھیسی ، انہاں ݙسائے جو لیزر شو اتے نیشنل فائر ورک دا انتظام کیتا ڳئے ، انہاں مزید ݙسائے جو سپیکر قومی اسمبلی دی قیادت اچ سارے پارلیمنٹیرینز اپݨے ہیروز کوں خراج تحسین پیش کرݨ کیتے اڄ جوائنٹ ڈیکلریشن پارلیمنٹ ہائوس اچ پیش کیتا ویسی ، انہاں آکھیے جو ڈائمنڈ جوبلی دی تقریبات الیکٹرانک میڈیا سودھے پی ٹی وی، ریڈیو پاکستان اتے ایف ایم ریڈیو تے وی سݨی ونڄ سڳدی اے ، ایندے توں پہلے وفاقی وزیر اطلاعات مریم اورنگزیب وزارت اطلاعات، سی ڈی اتے فیڈرل ڈائریکٹوریٹ آف ایجوکیشن دے زیر اہتمام پاکستانی پرچم کوں پینٹنگ کرݨ تے ڈائمنڈ جوبلی فیسٹیول دی تقریبات اچ بحیثیت مہمان خصوصی شرکت کیتی۔ ایں موقع تے ڈائمنڈ جوبلی فیسٹیول اچ پولیس اتے فرنٹیئر کور دے دستیں مارچ پاسٹ کیتا۔ پریڈ اچ اسلام آباد پولیس، پنجاب پولیس، سندھ پولیس، بلوچستان پولیس، خیبر پختونخوا پولیس، آزاد کشمیر پولیس اتے فرنٹیئر کور دے دستے موجود ہن۔ پولیس فورس اتے فرنٹیئر کور دے دستیں معزز مہماناں کوں سلامی پیش کیتی۔ اسپیشل سیکورٹی یونٹ سندھ پولیس، کائونٹر ٹیررازم ڈیپارٹمنٹ، اسلام آباد پولیس دے دستیں وی پریڈ اچ حصہ ڳھدا تے ”اللہ ہو” دا نعرہ بلند کریندے ہوئیں سلامی دے چبوترے دے سامݨے توں گذریے۔ پریڈ دے بعد اسلام آباد پولیس دے مختلف ڈویژنز دے ٹریفک ٹرانسپورٹ فلیٹ فلیگ مارچ کریندے ہوئیں سلامی دے چبوترے دے سامݨے گذریے۔ تقریب اچ مسلم لیگ (ن) دی رہنما طاہرہ افضل تارڑ، سیکریٹری اطلاعات شاہیرہ شاہد، پرنسپل انفارمیشن آفیسر مبشر حسن، اسلام آباد پولیس دے اعلیٰ حکام، گلوکاراں سودھے عوام دی وݙی تعداد موجود ہئی۔