یتیم ٻالاں دے سر تے دست شفقت رکھݨ اہم ذمہ واری اتے خدمت اے، سویٹ ہومز دے ٻالاں دی بہتری تے ترقی دے حکومت مزید اقدامات کریسی،،شہباز شریف

اسلام آباد۔14اگست (اے پی پی):وزیراعظم شہباز شریف آکھیے جو یتیم ٻالاں دے سر تے دست شفقت رکھݨ آہم ذمے واری تے خدمت اے، حکومت سویٹ ہومز دےٻالاں دی بہتری تے ترقی کیتے مزید اقدامات چیسی ، یتیم ٻالاں دی کفالت تے تعلیم وتربیت دا فریضہ چا تے زمرد خان اتے انہاں دے ساتھی ھک عظیم کم کریندے پئن ۔وزیراعظم سویٹ ہومز دے ٻالاں کیتے بساں دا تحفہ ݙیوݨ دا اعلان وی کیتا ، اتوار کوں وزیر اعظم یوم آزادی دی ڈائمنڈ جوبلی دے موقع تے پاکستان سویٹ ہومز دا دورہ کیتے تے جشن آزادی دے حوالے نال تقریب اچ شرکت کیتی ، سویٹ ہومز دے ٻالاں ولوں وزیر اعظم دی آمد تے انہاں دا پرتپاک خیرمقدم کیتا ڳے ۔سویٹ ہومز دے خاکی وردی اچ ملبوس ٻالاں مارچ پاسٹ کیتا تے وزیر اعظم کوں سلامی ݙتی۔ایں موقع تے وزیراعظم دے رلے وزیر اطلاعات ونشریات مریم اورنگزیب سرپرست اعلیٰ پاکستان سویٹ ہومز زمردخان،وفاقی وزیر مرتضی جاوید عباسی،حنیف عباسی،انجم عقیل،چوہدری یاسین وی موجود ہن۔ایں موقع تے خطاب کریندےہوئیں وزیر اعظم شہباز شریف آکھیے اڄ پوری قوم یوم آزادی منیندی پئی اے تے یوم آزادی دی 75 ویں سالگرہ اے جیڑھی جو پاکستان سودھے پوری دنیا اچ پاکستانی اے ݙینھ منیندے پئن ،پاکستان سویٹ ہومز اچ قوم دے پیارے ٻالاں نال مل تے ٻہوں خوشی تھئی اے ،اے صدقہ جاریہ اے، زمرد خان اتے انہاں دے ساتھیاں اے عظیم ذمہ واری سنبھالی اے۔ایجھے ٻال جیڑھے جو والدین دے سایہ توں محروم ہن انہاں دے سراں تے دست شفقت رکھݨ آلے دین ودنیا ݙوہیں کمیندے پئن،ایں دا اللہ اجر ݙیسی اے ۔سینکڑاں بے سہارا ٻالاں کوں تعلیم دے زیور توں آراستہ کریندے پعن انہاں کیتے مفت تعلیم،قیام وطعام دا اہتمام کیتا ڳئے ، انہاں کوں جدیدعلوم توں آراستہ کریندے پئن ایں توں وݙی کوئی قومی خدمت نی تھی سڳدی ، وزیراعظم زمرد خان کوں دعوت ݙتی جو ݙساون جو حکومت انہاں دی کیا مدد کرسڳدی اے ، انہاں دیاں جائز ضرورتاں اچ حکومت پاکستان انہاں دا پورا ہتھ ونڈیسی ،انہاں ٻالڑیاں کوں بہترین سہولتاں ݙیوݨ کیتے ہر ویلھے حاضر ہیسے ۔زمرد خان ولوں ٻالاں کیتے ٹرانسپورٹ دا مسئلہ چاوݨ تے وزیراعظم سویٹ ہومز دے ٻالاں کیتے بساں دا تحفہ ݙیوݨ دا اعلان کیتے ۔وزیر اعظم ایں موقع تے پاکستان اتے قائد اعظم زندہ باد دےنعرے ؤی لوائے۔جیں دا ٻالیں جواب ݙتا ، انہاں ایں موقع تے ٻالاں دے رلے جشن آزادی دا کیک کٹیا تے انہاں ٻالاں کوں کیک وی کھوایا ، وزیراعظم ٻالاں نال ڳھل مل ڳعے تے انہاں دے نال ڳالھ وی کیتی۔