پاک فوج دے دستے سندھ، بلوچستان، کے پی اتے پنجاب دے چھل دے علاقیاں اچ ریسکیو اتے ریلیف آپریشنز اچ مصروف ہن

اسلام آباد۔23اگست (اے پی پی) پاک فوج دے دستے سندھ، بلوچستان، کے پی اتے پنجاب دے چھل دے علاقیاں اچ ریسکیو اتے ریلیف آپریشنز اچ مصروف ہن ۔ پاک فوج دے شعبہ تعلقات عامہ آئی ایس پی آر دے مطابق سندھ اچ حیدرآباد، سانگھڑ، بدین، ٹھٹھہ، جامشورو، نوشہرو فیروز اتے سندھ دے مختلف ضلعیاں اچ ریسکیو اتے ریلیف دی کاروائیاں جاری ہن۔ متاثرہ علاقیاں اچ راشن تقسیم کیتا ویندا پئے اتے طبی امداد وی ݙتی ویندی پئی اے۔ پنجاب اچ پاک فوج دے ہیلی کاپٹراں ڈی جی خان ضلع دے پرے دے علاقیاں اتے ناقابل رسائی علاقیاں اچ چھل توں متاثرہ لوکاں کیتے امدادی سامان دی ونڈ اچ سول انتظامیہ دی مدد کریندے پئن۔ پاک آرمی ایوی ایشن دے ہیلی کاپٹراں ڈی جی خان دے ساریاں توں ودھ متاثر علاقیاں اچ امدادی کاروائیاں کیتے چار پروازاں کیتن جئیں اچ مبارکی، فضلہ کیچ، بستی بزدار شامل ہن۔ خیمے اتے راشن چھل متاثرین تئیں پڄا ݙتے ڳئن۔ بلوچستان اچ فوج اتے ایف سی بلوچستان کوئٹہ، پشین، قلعہ سیف اللہ، زیارت، ژوب، لورالائی اتے نوشکی اچ سول انتظامیہ دی مدد کریندے پئن۔ نصیر آباد، دکی اتے لسبیلہ دے علاقیاں اچ ریلیف کیمپ قائم کر ݙتے ڳئن۔