وزیراعظم محمد شہباز شریف دی اڳواݨی اچ سیلاب دی صورتحال سانڳے اجلاس

اسلام آباد۔25اگست(اے پی پی)وزیراعظم محمد شہباز شریف چھل دے متاثراں لوکاں دی حالت تے چنتا کریندے آکھیے جو حکومت تیکھے ہر متاثرہ پاکستانی کولو پڄسی، حکومت کلہیں بحالی دا کم نی کر سڳدی، عالمیا دارے وی ہتھ ونݙاون۔ اے ڳالھ انہاں اسلام آباد اچ سیلاب زدگان دی مدد کیتے انٹرنیشنل پارٹنرز نال اجلاس دی اڳواݨی کریندے آکھی۔ اجلاس اچ ورلڈ بینک، ایشائی ترقیاتی بینک، عالمی مالیاتی اداریں ، بین الاقوامی ڈویلپمنٹ، ڈونرز سودھا چین، امریکہ اتے یورپی ملکان دے نمائندیاں شرکت کیتی۔ اجلاس اچ اقوام متحدہ دے مختلف ذیلی اداریاں، عالمی ادارہ صحت دے نمائندے وی موجود ہن۔ وزیراعظم شہباز شریف انٹرنیشنل پارٹنرز کوں ملک اچ ڄوکے چھل پاروں تباہ حال دی ارداس ݙتی جو سندھ اتے بلوچستان اچ ودھ سیلاب آئے، ملک اچ ایمرجنسی دی صورتحال اے، وݙا جانی و املی ضیان تھئے، تریمتیں اتے ٻالاں سودھا سیکڑاں لوک موئن، مال مویشی لڑھ ڳعے، مکان ݙٹھ اتے انفراسٹرکچر تباہ تھئے، فصلاں وی نی بچیاں، رابطہ سڑکاں، پل واھوݨ نال زمینی رستے کٹ ڳین اتے امدادی کماں اچ اوکھ اے۔ انہاں آکھیے جو متاثرہ علاقیاں اچ ریلیف سانڳے این ڈی ایم اے، پاک فوج اتے ٻئے ادارے امدادی کماں اچ لڳے ہوئن، سیلاب متاثڑین کوں کلہا نا چھوڑیا ویسی۔