وزیرِاعظم شہباز شریف بجلی دی 200 یونٹ تئیں دے صارفین دے ٻلز24 گھنٹے دے اندرگھٹ کرݨ دی ہدایت ، ٻلز دی تصحیح کیتے ڈسکوز دا عملہ 24 گھنٹےکم کرے

اسلام آباد۔26اگست (اے پی پی):وزیرِ اعظم شہباز شریف بجلی دے صارفین دیاں شکایتاں دے ازالے کیتے اعلیٰ سطحی کمیٹی قائم کریندے ہوئیں 200 یونٹ تئیں دے صارفین دے ٻلز کوں 24 گھنٹے دے اندرگھٹ کرݨ دی ہدایت کیتی اے ۔ اے ہدایت وزیراعظم جمعے کوں آپݨی زیرصدارت بجلی دے صارفین دے مسئلیں دے حل کیتے اعلی سطح دے اجلاس اچ کیتی اے ۔ اجلاس کوں ݙسایا ڳئے جو وزیرِ اعظم دے بجلی دے صارفین کیتے اعلان کیتے ڳئے ریلیف پیکیج تے عملدرآمد یقینی بݨایا ویندا پئے ، ھک کروڑ 66 لکھ صارفین کوں فیول پرائس ایڈجسٹمنٹ دی مد اچ ݙتے ڳئن ریلیف دے تحت بلز دی تصحیح جاری اے۔ وزیرِ اعظم ریلیف دے اقدامات تے فوری عملدرآمد کوں یقینی بݨاوݨ دی ہدایت جاری کیتن ، وزیرِ اعظم بجلی دے صارفین دیاں شکایتاں مکاوݨ کیتے اعلی سطح دی کمیٹی قائم کرݙتی ۔ وزیرِ اعظم ہدایت کیتی اے جو 200 یونٹ تئیں دے بجلی صارفین دے ٻلز اچ اعلان کیتے ڳئے ریلیف کوں 24 گھنٹے اچ رلایا ونڄے تے صارفین دے ٻلز کوں گھٹ کیتا ونڄے ۔ بجلی دے بلز دی تصحیح کیتے ڈسکوز دا عملہ 24 گھنٹےکم کرے۔ بلز دی تصحیح کیتے عملے دیاں چھٹیاں ختم کرتے ایں کم کوں وختی نبیڑ تے رپورٹ پیش کیتی ونڄے ،بلز جمع کراوݨ کیتے بینکاں ککوں آندے ݙینھاں اچ کھلا رہݨ دی ہدایت کیتی ونڄے۔