وزیراعظم شہباز شریف سکھراچ سیلاب متاثرین دے کیمپ دا معائنہ کیتے ، سیلاب توں ضیان ، متاثرین دی بحالی دے اقدامات تے بریفنگ ݙتی ڳئی

اسلام آباد۔26اگست (اے پی پی):وزیراعظم محمد شہباز شریف سکھراچ سیلاب متاثرین کیتے لاتے ڳئے کیمپ دا معائنہ کیتے ، جمعے کوں وزیراعظم محمد شہباز شریف سندھ دےسیلاب توں متاثرہ علاقیں دے ھک ݙینھ دے دورے تے سکھر پڄے ۔وفاقی وزیر اطلاعات ونشریات مریم اورنگزیب، وفاقی وزیر بجلی انجینئر خرم دستگیروی انہاں دے رلے ہن جݙاں جو وزیرخارجہ بلاول بھٹو زرداری، وفاقی وزیر آبی وسائل سید خورشید احمد شاہ اتے وزیراعلی سندھ مراد علی شاہ بیگم نصرت بھٹو ایئرپورٹ سکھر تے وزیراعظم دا استقبال کیتا۔وزیراعظم کوں سیلاب زدگان دی ݙیکھ بھال کیتے لاتے ڳئے فری میڈیکل کیمپ دا دورہ کرایا ڳئے۔ سکھر دی ضلعی انتظامیہ تے پی ڈی ایم اے دے نمائندے سیلاب توں تھیوݨ آلے ضیان تے متاثرہ لوکاں دی بحالی سانڳے کیتے ونڄݨ آلے اقدامات بارے بریفنگ ݙتی ۔ وزیراعظم کوں ݙسایا ڳیا جو سیلاب توں انفراسٹرکچر اتے فصلاں تباہ تھی ڳئن ۔متاثرین کیتے 90 عمارتاں اچ عارضی پناہ گاہواں قائم کیتیاں ڳئن تے میڈیکل ٹیماں تے موبائل ہسپتال وی کم کریندے پئن ، پی ڈی ایم اے اتے این ڈی ایم اے متاثرین دی کافی مدد کیتی اے ۔ ایں توں علاوہ پاکستان آرمی اتے نیوی وی بھرپور مدد کریندی پئی اے ۔ وزیراعظم کوں متاثرین دی بحالی سانگے کیتے ونڄݨ آلے اقدامات تے ضرورتاں بارے ݙسایا ڳئے ۔