سیلاب اتے بارشاں نال ہݨ تئیں 3 کروڑ 30 لکھ لوک متاثر تھین، ارباں روپے دا نقصان تھئے، وزیرِ اعظم شہباز شریف دی سفیراں نال ملاقات

اسلام آباد۔26اگست(اے پی پی)وزیرِ اعظم محمد شہباز شریف آکھیے جو اڄوکے سیلاب نال ملک اچ 3 کروڑ 30 لکھ دے نیرے لوک متاثر تھین، متاثرین کوں کھاوݨ پیوݨ دیاں شئیں، ادویات اتے خیمے ݙیوݨ ہک وݙا چیلنج اے، گھراں، املاک اتے انفراسٹرکچر کوں نقصانات دا اندازہ ارباں روپے اچ اے، عالمی مالیاتی اداریاں اتے تنظیماں ولوں تعاون تے مشکور ہیں۔ اے ڳالھ انہاں اسلام آباد اچ مختلف ممالک دے سفیراں نال ملکی سیلابی صورتحال تے الایا۔ وزیراعظم آکھیے جو پاکستان اچ 30 سال دی ریکارڈ بارش تھئی اے، سیلابی ریلیاں اچ 9 سو توں ودھ لوک موئن، 13 توں ودھ لوک زخمی ہین اتے 8 لکھ مال مویشی لڑھین۔ سیلاب متاثرین دی تعداد 3 کروڑ 30 لکھ اے۔ انہاں آکھیا جو حکومت سیلاب زدگان دے فوری ریسکیو، امداد اتے بحالی کیتے سارے وسائل لیندی پئی اے، فلڈ ریلیف کیش پروگرام دے تحت 25 ہزار فی خاندان ݙیندے پئے ہیں، پاکستان اپݨی معاشی مشکلات دے باوجود سیلاب متاثرین دی ترجیحی بنیاداں تے امداد کریندا پئے۔