وزیراعظم نوشہرہ اچ سیلاب متاثرین نال ڳھل مل ڳئن ، ہر ممکن تعاون دا یقین ݙیوائے

پشاور۔29اگست (اے پی پی):وزیراعظم محمد شہباز شریف سنوار کوں اتھاں سیلاب زدگان ریلیف کیمپ دا دورہ کیتے جتھاں او ٻالاں سودھے سیلاب زدگان نال ملیے تے انہاں کوں حکومت ولوں ہر ممکن تعاون دا یقین ݙیواے ۔سیلاب متاثرین نال ڳالھ مہاڑ کریندے ہوئیں وزیراعظم ضلع نوشہرہ دے سیلاب توں متاثرہ لوکاں نال ہمدردی دا اظہار کیتے اتے یقین ݙیوائے جو حکومت انہاں دی بحالی اتے آبادکاری کیتے ہر ممکن کوششاں کریسی ۔شہباز شریف آکھیے جو حکومت آخری سیلاب زدگان دی بحالی اتے آباد کاری تئیں آپݨیاں کوششاں کوں جاری رکھیسی ، انہاں آکھیے جو وفاقی تے صوبائی حکومتاں ، افواج پاکستان، این ڈی ایم اے اتے ٻئے قومی تعمیراتی محکمے سیلاب زدگان تئیں پڄݨ تے انہاں کوں ہنگامی بنیاداں تے ضروری امداد ݙیوݨ کیتے سانجھے تعاون نال کم کریندے پئن ، سیلاب توں تباہ تھیوݨ آلیاں سڑکاں دی نویں سروں تعمیر کیتی ویسی ۔وزیراعظم امید ظاہر کیتی جو ملک سیلاب دی موجودہ صورتحال توں کامیابی نال نل ویسی اتے متاثرین اپݨے معمولات زندگی دے پاسے آویسن ۔وزیراعظم کیمپ دے اندر سیلاب متاثرین دے مسئلے سݨیے تے انہاں کوں ہر ممکن تعاون دا یقین ݙیوائے ۔ شہباز شریف متاثرین کوں آکھیے جو او پاکستان دی ترقی و خوشحالی اتے مستقبل دی آفات توں ساݙے عوام دی حفاظت کیتے دعا کرن۔ایں موقع تے وزیراعظم ٻالاں کوں پیار وی کیتا ۔ وفاقی وزیر مرتضی جاوید عباسی، وزیراعظم دے مشیر انجینئر امیر مقام اتے ایم پی اے اختیاار ولی وی وزیراعظم دے رلے ہن ۔