وزارت داخلہ امریکہ، جاپان، فرانس، جرمنی اتے برطانیہ سودھا ٻئے 7 ملکاں اتے 15 عالمی تنظیماں کوں چھل اچ بچائو اتے ریلیف دا کم کرݨ دی اجازت ݙے ݙتی

اسلام آباد۔1ستمبر(اے پی پی) وزارت داخلہ امریکہ، جاپان، فرانس، جرمنی اتے برطانیہ سودھا ٻئے 7 ملکاں اتے 15 عالمی تنظیماں کوں چھل اچ بچائو اتے ریلیف دا کم کرݨ دی اجازت ݙے ݙتی اے۔ ݙسایا ڳئے جو پہلے توں موجود سماجی تنظیماں کوں پاکستان اچ امدادی کماں سانڳے این او سی جاری کر ݙتا ڳئے۔ ترجمان موجب پاکستان دے سیلاب زدہ علاقیاں اچ ریسکیو اتے ریلیف دے کماں کیتے ٹیرفنڈ(برطانیہ)، سکیور اسلامک فرانس (فرانس)، ہیلپنگ ہینڈ (برطانیہ)، ہیومن اپیل(برطانیہ)، کیئر انٹرنیشنل (امریکہ)، کشمیر آرفن ریلیف ٹرسٹ (برطانیہ)، مرسی کارپس (امریکہ)، لائف لائن کرسچن ڈویلپمنٹ سروسز(جرمنی)، مسلم ہینڈز(برطانیہ)، سی بی ایم ای ڈاٹ وی ڈاٹ(جرمنی)، ترکی معرف فائونڈیشن (ترکی)، کیتھلک ریلیف سروسز (امریکہ)، اے اے آر جاپان(جاپان)، کے این کے جاپان(جاپان) کوں ریسکیو، ریلیف اتے بحالی دے کماں دی اجازت کیتے وزارت داخلہ باقاعدہ نوٹیفکیشن جاری کیتے۔ انہاں این جی اوز کوں صرف سیلاب زدہ علاقیاں اچ ریسکیو، ریلیف، بحالی اتے امداد دے کماں کیتے اجازت ݙتی ڳئی اے۔