ٹرانس جینڈر ایکٹ دا مقصد شناخت ݙیوݨ اے ، کوئی اعتراض آئے تاں میڈیکل بورڈ بݨاوݨا چاہیدے ،خواجہ سعد رفیق

لاہور۔23ستمبر (اے پی پی):مسلم لیگ ن دے مرکزی رہنما و وفاقی وزیر ریلوے خواجہ سعد رفیق آکھیے جو ٹرانس جینڈر ایکٹ تے کوئی اعتراض آئے تاں ایں معاملے تے میڈیکل بورڈ بݨاوݨا چاہیدے ،ایں ایکٹ دا مقصد شناخت ݙیوݨ اے تاں جو خواجہ سرائیں دے شناختی کارڈز بݨ سڳن ، کہیں کوں حقوق ݙیوݨ توں محروم نی کیتا ونڄ سڳدا ، اے 2018 اچ پاس تھئے ، سوال اے ہے جو اڄ ایندا کیوں خیال آڳئے ۔لاہور اچ احتساب عدالت پیشی دے موقع تے میڈیا نال ڳالھ مہاڑ کریندے ہوئیں خواجہ سعد رفیق آکھیے جو ملمک اچ سیلاب آئے عمران خان لانگ مارچ دیاں ڳالھیں کریندے رہیے تے آکھدے رہیے جو لانگ مارچ کریساں تے اسلام آباد کوں بند کرݙیساں ، عمران خان کوں لانگ مارچ توں نی روکیندے ،قانون دے دائرے اچ رہ تے احتجاج کرݨ ساریں دا حق اے ، عمران خان وی قانون دے دائرے اچ رہن ۔ خواجہ سعد رفیق آکھیے جو ایں ویلھے سیلاب توں ترائے کروڑ لوک ٻݙدے پئن ، لوک بے گھر تھی چکن ، انہاں کنے کھاوݨ کیتے کجھ کائنی تے انہاں حالات اچ عمران خان وختی نویں انتخابات دا مطالبہ کریندے پئن جیڑھی انہاں دی بے حسی و خود غرضی دی انتہا اے ۔خواجہ سعد رفیق عمران خان دے گزریل ݙینھ کیس اچ معافی دا ذکر کریندے ہوئیں آکھیے جو کوئی پتلی ڳلی توں نکلدا پئے تے تاں کوئی کئی سال تئیں سزا کٹیندے ۔ وفاقی وزیر ریلوے آکھیے جو میݙے کیس اچ چار جج بدل ڳئن تاں جو میکوں ہݨ وی انصاف دی امید اے۔