اسلام آباد۔23نومبر (اے پی پی) وفاقی وزیر اطلاعات تے نشریات مریم اورنگزیب آکھیا جو پوری دنیا اچ سکریم ٹورازم اہم مقام حاصل کر ڳھدی اے، سکرین ٹورازم دے ذریعے اساں آپݨی ثقافت اتے معاشرتی اقدار کوں ودھا سڳدوں۔ اے ڳالھیں انہاں بدھ کوں پی ٹی وی فلم اتے فاطمہ جناح وومن یونیورسٹی وچال ”نقش ڈیجیٹل فلم” کیتے مفاہمت دی یادداشت تے دستخطاں دی تقریب توں خطاب کریندیں ہوئیں آکھی۔ وفاقی وزیر اطلاعات آکھیا جو بدقسمتی نال پاکستان دی فلم انڈسٹری ٻہوں اوکھے حالات دا سامݨا کیتے، سٹھ دےݙھاکے اچ پاکستان جنوبی ایشیا اچ فلم سازی دےلحاظ نال ہک وݙا ملک تھیوݨ دے نال نال اپݨے ہمسائے ملکاں دے مقابلے اچ فلمی صںعت دا ساریاں توں وݙا پروڈیوسر ملک ہئی۔ انہاں آکھیا جو مسلم لیگ (ن) اپݨے پچھلے دور حکومت اچ 2018ء اچ پاکستان دی ستر ویں سالڳنڈھ دے موقع تے فلم اینڈ کلچر پالیسی دا اجراء کیتے۔ اے پالیسی پاکستان دی ستر سالہ تاریخ اچ پہلی واری ٻݨائی ڳی ہئی۔ اے اساݙا ادھورا ٹاسک ہئی جیڑھا اساں اپریل 2022 اچ ولا شروع کیتے۔ تقریب توں فاطمہ جناح یونیورسٹی دی ڈیپارٹمنٹ آف انگلش دی چیئرپرسن اتے سوشل سائنسز ڈیپارٹمنٹ دی سینئر رپورٹنگ آفیسر پروفیسر ڈاکٹر ثروت رسول وی خطاب کیتا۔ مفاہمت دی یادداشت تے پی ٹی وی فلمز دی ہیڈ مس نریتا اتے فاطمہ جناح وومن یونیورسٹی دی ڈیپارٹمنٹ آف انگلش دی چیئرپرسن ڈاکٹرثروت رسول دستخط کیتے۔ تقریب اچ وفاقی سیکریٹری اطلاعات شاہیرہ شاہد، پرنسپل انفارمیشن آفیسر مبشر حسن، ایم ڈی پی ٹی وی سہیل علی خان، پی ٹی وی فلم دی ہیڈ مس نریتا، فاطمہ جناح وومن یونیورسٹی دی ڈیپارٹمنٹ آف انگلش دی چیئرپرسن ڈاکٹر ثروت رسول، ہیڈ آف ڈیپارٹمنٹ کمیونیکیشن اینڈ میڈیا اسٹڈیز ڈاکٹر محمد علی، اسسٹنٹ پروفیسر ڈیپارٹمنٹ آف کمیونیکیشن اینڈ میڈیا اسٹڈیز ڈاکٹر شازیہ، سینئر لیکچرر ڈیپارٹمنٹ آف کمیونیکیشن اینڈ میڈیا اسٹڈیز مسٹر یوسف، منیجر او آر آئی سی ڈاکٹر عماد سمیت وزارت اطلاعات تے نشریات دے اعلیٰ حکام وی موجود ہن۔
