اسلام آباد۔28نومبر(اے پی پی) سعودی عرب دے کنگ سلمان ریلیف سنٹر پاکستان دے سیلاب متاثرین کیتے ونٹر ریلیف پیکیج دی تقسیم دا عمل شروع کرݙتے۔ سعودی سفارتخانے توں جاری بیان موجب کنگ سلمان ہیومینٹیرین ایڈ اینڈ ریلیف سنٹر پاکستان اچ آپݨی امدادی سرگرمیاں مزید ودھیندے ہوئیں ونٹر ریلیف پیکیج دی تقسیم شروع کرݙتی تاں جو متاثرین کوں ہر ممکن ریلیف ملے ۔ بیان اچ آکھیا ڳئے جو اڄوکے سال غیر معمولی ساوݨ دے مینھ پاروں آوݨ آلے ݙراکلے سیلاب 33 ملین لوکاں کوں متاثر کیتے ، تباہی نال نبݨݨ کیتے متاثرہ لوکاں دی مدد دی خاطر کنگ سلمان ہیومینٹیرین ایڈ اینڈ ریلیف سینٹر پاکستان دے سیلاب آلے علاقیں اچ ہنگامی امداد دی فراہمی اچ مصروف عمل اے۔ بیان اچ مزید آکھیا ڳئے جو ایں ونٹر پیکج دے تحت پاکستان دے 14 ضلعیں (گانچے ، سکردو ، نگر ، استور ، غذر ، چترال ، سوات ، اپر دیر ، مانسہرہ ، ڈیرہ اسماعیل خان ، دادو ، جام شورو ، قمبر شھدا کوٹ) اچ ونٹر ریلیف پیکیج ونڈیا ویندا پئے، ونٹر پیکیج اچ 50 ہزار سوڑیں تے 25 ہزار ونٹر کٹس ہن جنہاں اچ مردانہ زنانہ گرم شالاں تے ٻالیں تے وݙیں کیتے گرم کپڑے شامل ہن۔ کنگ سلمان سینٹر دا اے ریلیف پیکیج این ڈی ایم اے ، صوبائی حکومت دی مدد نال شفاف طریقے نال ݙتا ویسی جیں توں مجموعی طور تے ھک لکھ 75 ہزار توں ودھ لوک فیدہ چیسن۔
