اسلام آباد۔28نومبر(اے پی پی) وزیر مملکت خارجہ امور حنا ربانی کھر ھک ݙینھ دے دورے تے اڄ منڳل کوں افغانستان دے دارالحکومت کابل پڄسن ۔ ترجمان دفتر خارجہ دی طرفوں جاری بیان موجب وزیر مملکت دورہ دے دوران ھک اعلیٰ سطح دے وفد دی قیادت کریسن ۔ وزیر مملکت کابل اچ افغان عبوری حکومت نال سیاسی مذاکرات کریسن ۔ ڳالھ مہاڑ اچ تعلیم، تجارت اتے سرمایہ کاری دے شعبیں اچ تعاون، علاقائی رابطہ ، عوامی رابطے تے علاقائی سلامتی متعلق امور سودھے ݙوپاسے تعلقات تے ڳالھ مہاڑ کیتی ویسی ۔ وزیر مملکت افغانستان اچ امن کوں مضبوط بݨاوݨ تے خوشحالی کوں ودھاوݨ کیتے پاکستان دے مسلسل عزم اتے حمایت دا وی اعادہ کریسن ۔ بیان موجب پاکستان دوست اتے پڑوسی دے طور تے افغانستان اچ انسانی بحران کوں گھٹ کرݨ تے افغان مرد، تریمتاں تے ٻالاں دی معاشی خوشحالی دے حقیقی مواقع پیدا کرݨ دیاں کوششاں دے ذریعے افغانستان دے عوام نال آپݨی مستقل یکجہتی دا اعادہ کریسی ۔
