کراچی۔30نومبر(اے پی پی):پاک بحریہ دے ݙو جہازاں فضائی یونٹ دے تعاون نال شمالی بحیرہ عرب اچ تقریباً 5800 کلوگرام منشیات قبضے اچ گھن ڳھدی اے ۔ پاکستان بحریہ دی طرفوں جاری اعلامیہ موجب پاک بحریہ بحیرہ عرب اچ تزویراتی طورتے اہم آبی گزرگاہواں تے کہیں وی قسم دی غیر قانونی سرگرمیاں کوں روکݨ ،انہاں دا تدراک کرݨ تے ناکام بݨاوݨ دے آپݨے قومی عزم کوں جاری رکھیا ہویا اے ،اڄوکی پیشرفت اچ پاک بحریہ دے ݙو جہازاں بحیرہ عرب اچ کامیاب انسداد منشیات آپریشن کیتے جیں دے نتیجے اچ منشیات دی وݙی کھیپ قبضے اچ گھن ڳھدی ۔شمالی بحیرہ عرب اچ میری ٹائم سیکیورٹی آپریشنز کریندے ہوئیں پاک بحریہ دے جہازاں ݙو مشکوک کشتیاں کوں ڳولیا تے مؤثر اندازاچ کارروائی کریندے ہوئیں انہاں کشتیاں دی چھان بین تے منشیات دی وݙی مقداربرآمد کیتی جیں دی بین الاقوامی منڈی اچ مالیت دا تخمینہ تقریباً 8.6 ارب روپے اے۔ وٹھیاں ڳیاں ݙوہیں کشتیاں کوں زمینی قانون دے مطابق مزید کارروائی کیتے قانون نافذ کرݨ آلے اداریں دے حوالے کرݙتا ڳئے ۔پاک بحریہ دا کامیاب انسداد منشیات آپریشن سمندر اچ امن و امان برقرار رکھݨ دی قومی اتے بین الاقوامی ذمہ واریاں نبھاوݨ اچ پاک بحریہ دے عزم دا مظہر اے۔ پاک بحریہ کہیں وی غیر قانونی سرگرمی نال نبݨݨ تے آپݨی سمندری سرحداں دی حفاظت کیتے ہر ویلھے تیار اے۔
