خصوصی لوکاں کوں زندگی دے سارے پہلواں اچ ھکو سویں موقع ݙیوݨ کیتے اقدامات کریسوں ،صدر ڈاکٹر عارف علوی دا پیغام

اسلام آباد۔3دسمبر(اے پی پی):صدر مملکت ڈاکٹر عارف علوی خصوصی لوکاں دے عالمی ݙینھ دے موقع تے آپݨے پیغام اچ آکھیے جو خصوصی لوکاں دے حقوق اتے فلاح و بہبود دے ودھارے کیتے پاکستان عالمی برادری دے نال رل تے خصوصی لوکاں دا ݙینھ منیندا پئے ، خصوصی لوک یا مختلف صلاحیتاں دے حامل لوکاں کوں زندگی دے سارے شعبیں اچ مساوی اتے مکمل طور تے شامل کرݨ اہم اے ۔ ہفتہ کوں ایوان صدر میڈیا ونگ توں جاری بیان اچ صدر مملکت ڈاکٹر عارف علوی آکھیے جو دنیا اچ ھک ارب توں ودھ تقریبا 15فیصد آبادی کہیں نہ کہیں قسم دی معذوری دا شکار اے، انہاں 15 فیصد اچوں80فیصد خصوصی لوک ترقی پذیر ملکاں اچ رہندن ۔ انہاں آکھیے پاکستان اچ خصوصی لوکاں دی آبادی دا تخمینہ 10فیصد توں ودھ اے جیڑھا جو تشویشناک اعداد و شمار ہن۔ صدر مملکت آکھیے جو اڄ اساں عہد کریندوں جو ایں وݙی آبادی نال جڑیے دقیانوسی تصورات کوں مکیسوں ، خصوصی لوکاں دے جگ ݙیھاڑ دے موقع تے آؤ عہد کروں جو خصوصی لوکاں کوں زندگی دے سارے پہلوواں اچ ھکو سویں موقع ݙیوݨ کیتے اقدامات کریسوں ۔ صدر مملکت آکھیے اساں اڄ عہد کریندوں جو خصوصی لوکاں کوں معیاری تعلیم اتے ہنر ݙیسوں ، انھاں کوں معاشی اتے مالی طور تے بااختیار بݨیسوں ۔