حکومت عوام کوں سستی بجلی ݙیوݨ کیتے کم کریندی پئی اے، منگلا ڈیم منصوبہ پاک امریکا تعلقات دی بہترین مثال اے، وزیراعظم شہباز شریف دا منگلا اچ خطاب

منگلا۔5دسمبر(اے پی پی)وزیراعظم محمد شہباز شریف آکھیے جو حکومت عوام کوں سستی بجلی ݙیوݨ کیتے کم کریندی پئی اے کیوں جو پاکستان مہاگی توانائی نئیں سہہ سڳدا، منگلا ڈیم منصوبہ پاک امریکا تعلقات دی بہترین مثال اے، اے تجارت و سرمایہ کاری ودھاوݨ دا ٻہوں چنڳاں ویلھا اے، ملک اچ تعمیر و ترقی نعراں اتے دھرنیاں نال نئیں سیاسی استحکام نال آسی۔ اے ڳالھ انہاں منگلا ڈیم دے یونٹ 5 اتے 6 دی ریفربشمنٹ دی افتتاحی تقریب نال خطاب اچ آکھی۔ انہاں آکھیا جو حکومت عوام کوں کلین، گرین اتے سستی بجلی ݙیوݨ کیتے کم کرینید پئی اے، ڈیم دی مرمت، اپ گریڈیشن اتے ریفربشمنٹ سانڳے یو ایس ایڈ 150 ملین ڈالر ݙتن اتے فرانس 90 ملین یورو دا قرضہ ݙتے ڄݙاں جو 65 ملین یورو ٻعے ݙیوݨ دا وی وعدہ کیتے۔ انہاں منصوبے تے تعاون سانڳے امریکہ، جنرل الیکٹرک ہائیڈرو فرانس اتے واپڈا دیاں کوششاں دا شکریہ ادا کیتے۔ وزیراعظم آکھیا جو پاکستان کوں وݙے چیلنجز ہین، مخلوط حکومت ملک کوں اوکھ توں کݙھݨ اچ ردھی ہوئی اے، اللہ پاکستان کوں وݙے وسائل ݙتن جیندے صحیح استعمال نال ملک کوں تکڑا کریسوں، سستی توانائی دے منصوبیاں کوں مکمل نئیں تھیوݨ ݙتا ڳیا، اڄ ملک کوں ودھ رقم درآمدی مد اچ ݙیوݨی پوندی اے، ہݨ ڳالھیں دی بجائے کم کرݨا ہوسی اتے قول و فعل دا تضاد مکا تے قوم دا ہتھ ونݙاوݨا ہوسی، اپݨا محاسبہ کرتے عزم، ہمت اتے ڄذبے نال کم کرݨا ہوسی جو ملک اپݨے پیریں تے کھڑا تھی سڳے اتے کہیں دے اڳو ہتھ نال اݙݨے پوون۔