عمران خان ساݙے منصوبے بند کیتن، نواز شریف دے منصوبیاں دیاں تختیاں وٹاوݨ نال اڳو تے ودھݨ دی لیاقت نئیں آ ویندی، وزیراطلاعات مریم اورنگزیب

اسلام آباد۔14دسمبر(اے پی پی)وفاقی وزیر اطلاعات و نشریات مریم اورنگزیب آکھیے جو عمران خان ساݙے منصوبے بند کیتن، نواز شریف دے شروع کیتے ڳئے منصوبیاں دیاں تختیاں وٹاوݨ نال اڳو تے ودھݨ دی لیاقت نئیں آ ویندی، انہاں یوتھ پروگرام دا ناں وٹا تے کامیاب جوان رکھیے اتے 80 فیصد منصوبے بند کیتن، عمران خان معاشرے اتے نوجواناں کوں سرف فساد سکھائے، انہاں دی نیت ہوندی تاں وزیراعظم ہائوس کوں سازشاں اتے سیاسی انتقام گھر نا ٻݨیدے، ملک تے وزیراعظم نئیں ہک پروپیگنڈہ گروہ مسلط ہا ڄعیں چار سال اچ معیشت اتے روزگار کوں تباہ کیتے۔ اسلام آباد اچ پریس کانفرنس کریندے انہاں آکھیا جو 2013 اچ وزیراعظم نواز شریف”پرائم منسٹر یوتھ پروگرام“ شروع کیتا ہا جو نینگراں کوں روزگار ملے ٻھل عمران خان اپݨی 4 سالہ ناہلی اتے کرپشن لکاوݨ کیتے فساد، سیاسی انتقام اتے سیاسی عدم استحکام تے پورا زور لائی رکھیے، لوک سب ڄاݨدن جو پچھلے 4 سال اچ ملک نال کیہڑا کھیݙ کھیݙیا ڳئے؟ منصوبے صاف نیتاں نال کامیاب تھیندن۔ وفاقی وزیر اطلاعات آکھیا جو شہباز شریف حکومت ملدی ہی ولا یوتھ پروگرام تے کم شروع کیتے تاں جو مختلف طبقاں دے نوجواناں دے مسلیاں دے حل، روزگار دی راہ کݙھیڄے، ہݨ پرائم منسٹر یوتھ پروگرام دے تحت نوجواناں کیتے چھوٹے تے وݙے قرضے بحال تھیندے پن جیڑھے پچھلی حکومت بند کیتے ہن، 5 کروڑ توں ودھ نینگراں کوںر وزگار ݙتا ویسی، انوویشن ایوارڈز وی ݙتے ویسن، کھیݙاں اچ نینگراں دی حوصلہ افزائی تھیسی۔