اسلام آباد۔15دسمبر(اے پی پی):جمہوریہ تاجکستان دے صدر امام علی رحمان خمیس کوں وزیر دفاع خواجہ محمد آصف نال ملاقات کیتی۔ وزیر دفاع تاجکستان دی عسکری اتے سول قیادت تے ایندے عوام کیتے نیک خواہشات دا اظہار کیتے تے ایں ڳالھ تے روشنی پاتی جو افغانستان دے پڑوسی ہووݨ دے ناطے پاکستان اتے تاجکستان ݙوہیں کوں ھکو سویں سکیورٹی چیلنجز اتے خطرات دا سامݨا اے۔ پاکستان سارے مسئلیں دے پرامن حل تے یقین رکھیندے تے خطے اچ امن و استحکام دے ودھارے اچ تاجکستان دی کوششاں دی تعریف کریندے ۔ ایں ڳالھ تے اتفاق کیتا ڳئے جو پاکستان انٹیلی جنس صلاحیتاں اچ ودھارے تے تاجکستان دی مسلح افواج نال تکنیکی مہارت دے تبادلے اچ مدد ݙیندا رہ ویسی ۔وزیر دفاع مسلح افواج دے درمیان دوستانہ کھیݙاں دے مقابلے اتے ݙوہیں ملکاں دے خصوصی مواقع تے سانجھی بنیاداں تے فوجی بینڈ دی نمائش دی تجویز پیش کیتی۔ ملاقات دے دوران ݙوطرفہ دفاعی تعاون متعلق امور دے علاوہ دفاعی تعاون اچ ودھارے نویں رستے مسخر کرݨ تے ڳالھ مہاڑ کیتی ڳئی ۔ تاجک صدر اپݨی حکومت دے عزم دا یقین ݙیوائے تے ݙوطرفہ تعلقات کوں مضبوط بݨاوݨ کیتے پاکستان نال کم کرݨ دا عہد کیتے ۔ انہاں وزیر دفاع کوں وختی تاجکستان دورے دی دعوت ݙتی۔
