اسلام آباد۔15دسمبر (اے پی پی):ترجمان دفتر خارجہ آکھیے وزیر اعظم پاکستان شہباز شریف تے اقوام متحدہ دے سیکرٹری جنرل آندے سال9 جنوری کوں جنیوا اچ منعقد تھیوݨ آلی” کلیمیٹ ریزیلینٹ پاکستان“بارے بین الاقوامی کانفرنس دی مشترکہ صدارت کریسن ۔ دفتر خارجہ دی ترجمان ممتاز زہرہ بلوچ پریس بریفنگ اچ آکھیے جو پاکستان کانفرنس اچ ملک اچ آوݨ آلے ہولناک سیلاب دے بعد تعمیر نو، بحالی اتے اڳوں توں بچاوݨ بارے فریم ورک پیش کریسی جیڑھی سیلاب توں بعد آوݨ آلی تباہی دے تخمینے(پوسٹ ڈیزازسٹر ایسسمنٹ)تے مبنی اے جیں کوں 28 اکتوبر 2022 کوں شروع کیتا ڳیا ہئی ۔ انہاں آکھیے پاکستان اچ سیلاب توں تھیوݨ آلے ضیان دا تخمینہ 14.9 ارب ڈالر جݙاں جو 15.2 ارب ڈالر توں ودھ دا معاشی ضیان ایں توں علاوہ اے ، پاکستان کوں سیلاب دے بعد نویں سروں تعمیر کیتے 16 ارب ڈالر توں ودھ رقم دی لوڑھ اے ۔ ترجمان آکھیے اے کانفرنس تباہ کن سیلاب دے بعد ول بہتر تعمیر نو کیتے مدد دی خاطر بین الاقوامی برادری کوں متحرک کریسی ۔ انہاں آکھیے جو وزیر اعظم پاکستان اتے اقوام متحدہ دے سیکرٹری جنرل مشترکہ طورتے کانفرنس کیتے ڈونر ملکاں، بین الاقوامی مالیاتی اداریں اتے ٻئے ترقیاتی شراکت داراں کوں دعوت نامہ بھیج ݙتے۔
