اللہ تعالی توں دعا اے جو او عید دے بابرکت موقع تے ساݙے رمضان دے روزے اتے عبادتاں قبول فرماوے، صدر مملکت دا عید الفطر تے پیغام

اسلام آباد۔22اپریل (اے پی پی): صدر مملکت ڈاکٹر عارف علوی عید الفطر دے پر مسرت موقع تے پوری پاکستانی قوم تے سارے عالم اسلام کوں مبارخ ݙیندے ہوئیں آکھیے جو اللہ تعالی توں دعا اے جو او عید الفطردے ایں بابرکت موقع تے رمضان المبارک دے ساݙے روزے تے عبادتاں قبول فرماوے ۔ اللہ تعالی ملک پاکستان کوں ترقی، خوشحالی ، امن اتے استحکام عطا فرماوے۔ پاکستانی قوم کوں امن، عافیت اتے فراوانی عطا فرما تے ایندے ݙکھاں تے تکلیف دا مداوا فرماوے ۔ اللہ تعالی پورے عالم اسلام کوں اقوام عالم دے سامݨے سرخرو فرماوے۔ عیدالفطر دےموقع تے آپݨے پیغام اچ صدر مملکت ڈاکٹر عارف علوی آکھیے میں اللہ تعالی دے حضور دعا کرینداں جو اے عید اساں کیتے امن وسلامتی اتے خوشیاں دے ݙینھ گھن تے آوے تے ملک پاکستان کوں ترقی ، خوشحالی اتے استحکام عطا فرماوے۔ رمضان المبارک ساݙے اندر جتھا ں تقویٰ اتے پرہیزگاری پیدا کریندے اتھاں ݙوجھیں کوں تکلیف ، بھک تے پریشانی دا احساس وی پیدا کریندے ۔ اےاحساس کہیں وی معاشرے توں غربت اتے ناانصافی مکاوݨ دی بنیاد بݨ سڳدے ، اساکوں چاہیدے اساں عید دے ایں موقع تے عہد کروں جو اساں تقویٰ ، پرہیزگاری تے احساس دے جذبات اپݨے نال پورا سال گھن تے چلسوں معاشرے کوں خوشحال بݨاوݨ اچ کردار ادا کریسوں ، ایں ویلھے پاکستان کوں مشکل سیاسی تے اقتصادی حالات دا سامݨا ہے اتے اساں سارے ملک کیتے درد محسوس کریندے پیوں انہاں حالات اچ ، میں پوری قوم دی توجہ معاف کرݨ تے رحم فرماوݨ آلے رب دے احکامات دے پاسے کراوݨ چاہنداں جو اساکوں معاف کرݨ ، درگزر کرݨ تے بخش ݙیوݨ دا حکم ݙیندے تے فرمیندے جو ” بے شک اللہ بخشݨ آلا مہربان اے “۔ اللہ تعالیٰ قرآن اچ فرمیندے جو او نیکی تے احسان کرݨ آلیں نال محبت فرمیندے ، ایویں حضورﷺ وی اساکوں ݙوجھیں تے رحم کرݨ تے معاف کرݨ دی تلقین کیتی تاں جو اساں تے رحم کیتا ونڄے تے اللہ اساکوں معاف کرݙیوے ۔