اسلام آباد۔25اپریل(اے پی پی) وزیر خارجہ بلاول بھٹو زرداری آکھیے ٻاہرلے ملک رہݨ آلے پاکستانیاں دی سلامتی کیتے حکومت پاکستان دے عزم کوں سامݨے رکھیندے ہوئیں وزارت خارجہ سوڈان اچ پاکستانیاں دی ریلیف اتے ریسکیو اچ پیش پیش ہے۔ منڳل کوں دفتر خارجہ دی ترجمان دی طرفوں جاری بیان موجب وزیر خارجہ آکھیے اڄ خرطوم توں 211 پاکستانیاں کوں گھن تے ھک ٻیا قافلہ پورٹ سوڈان پڄ ڳئے ۔ تازہ ترین قافلے نال بحفاظت کڈھیے ونڄݨ آلے پاکستانیاں دی کل تعداد 700 تئیں پڄ ڳئی اے ، خرطوم اتے پورٹ سوڈان اچ سفیر میر بہروز ریگی دی ٹیم سوڈان اچ موجود پاکستانیاں دے قیام دی سہولت کیتے ݙینھ رات کم کریندی پئی اے ۔ انہاں آکھیے پاکستانیاں دے انخلا دے عمل کوں سوکھا بݨاوݨ کیتے خطے دے دوست ملک خصوصاً مملکت سعودی عرب دے نال مصروف عمل ہن ۔ وزیر خارجہ آکھیے میں خطے اچ ساݙے مشنز دی محنت اتے سیکرٹری خارجہ ڈاکٹر اسد مجید خان دی سربراہی اچ دفتر خارجہ دی پوری ٹیم دا شکر گزار ہاں جیڑھے جو بین ایجنسی کوآرڈینیشن دے عمل دی قیادت کریندے پئن۔
