اسلام آباد۔27اپریل (اے پی پی):چیئرمین سینیٹ محمد صادق سنجرانی نال چینی سرمایہ کاراں دے وفد ملاقات کیتی جیں اچ ملک اچ سرمایہ کاری دے موقع بارے ڳالھ مہاڑ کیتی ڳئی ۔ خمیس کوں سینیٹ سیکرٹریٹ توں جاری بیان موجب وفد ݙوطرفہ تعلقات کوں ودھارا ݙیوݨ تے پاکستان اچ چینی سرمایہ کاری ودھاوݨ دی خواہش دا اظہار کیتے۔ وفد پاکستان اچ مختلف شعبیں بالخصوص انفارمیشن ٹیکنالوجی، انفراسٹرکچر اتے ٻئے شعبیں اچ سرمایہ کاری اچ دلچسپی ظاہر کیتی۔ چیئرمین سینیٹ وفد دا خیرمقدم کیتا ت انہاں کوں سرمایہ کاری اچ سہولت ݙیوݨ کیتے حکومت اتے آپݨے بھرپور تعاون دا یقین ݙیوایا ۔ انہاں بلوچستان اتے بالخصوص گوادر کوں سرمایہ کاری کیتے موزوں قرار ݙیندے ہوئیں وفد کوں صوبے اچ سرمایہ کاری دی دعوت ݙتی۔ چینی سرمایہ کاراں پاکستان دے سٹریٹجک محل وقوع اتے تجارت و سرمایہ کاری دے ھک مرکز دے طور تے ایندی صلاحیت دی تعریف کیتی ۔ ݙوہیں فریقاں تعاون تے سرمایہ کاری دے مزید مواقع ڳولݨ تے اتفاق کیتا ۔ وفد پاکستان کوں مستقبل اچ سرمایہ کاری کیتے ھک پرکشش مقام قرار ݙیندے ہوئیں اعتماد دا اظہار کیتے۔چینی سرمایہ کاراں دا وفد مسٹر لین، مسٹر ڈين اتے مسٹر جوئے تے مشتمل ہئی۔ ملاقات اچ چیئرمین سینیٹ دے مشیر سید عابد حسن وی موجود ہن۔
