اسلام آباد۔27اپریل (اے پی پی):وزیراعظم محمد شہباز شریف اتے چینی وزیراعظم ݙوہیں ملکاں وچال سارے شعبیں اچ تعاون ودھاوݨ تے اتفاق کیتے تاں جو علاقائی امن، خوشحالی اتے استحکام اچ اپݨا کردار ادا کرݨ دے نال نال آپݨے ملکاں دے لوکاں کوں فیدہ پڄاوݨ کیتے مشترکہ مقصد کوں حاصل کیتا ونڄ سڳے۔ خمیس کوں وزیراعظم آفس دے میڈیا ونگ توں جاری بیان موجب وزیر اعظم محمد شہباز شریف تے چین دے وزیر اعظم لی چیانگ دے وچال ٹیلی فون تے ڳالھ مہاڑ تھئی ،اے ڳالھ مہاڑ روایتی گرمجوشی اتے ہم آہنگی تے مبنی ہئی جیں اچ پاک چین سدا بہار سٹریٹجک کوآپریٹو پارٹنرشپ کوں اجاگرکیتا ڳئے ۔شہباز شریف چینی وزیر اعظم کوں ایں عہدے کیتے انہاں دے اڄوکے انتخاب تے مبارخ ݙتی جیڑھے جو چینی قوم دے گھاٹے اعتماد اتے عوامی خدمت اچ انہاں دی ٻہوں ساریاں کامیابیاں توں پیدا تھیوݨ آلے انہاں تے اعتماد دی عکاسی کریندے ۔ سدا بہارشراکت دار اتے نیڑے دوستاں دی حیثیت توں پاکستان چین دی پرامن ترقی کوں بین الاقوامی امن اتے استحکام دے مثبت عنصر دے طور تے تعریف کیتی تے ایں ڳالھ تے یقین ظاہر کیتے جو چین ترقی تے بحالی دے پاسے آپݨے سفر اچ اہم سنگ میل حاصل کریندا رہسی ۔ وزیر اعظم چین دے بنیادی مسئلیں بشمول ’’ون چائنا‘‘ پالیسی، تائیوان، تبت، سنکیانگ، ہانگ کانگ اتے بحیرہ جنوبی چین تے پاکستان دی بھرپورحمایت دا اعادہ کیتا۔ انہاں جموں و کشمیر دے جھیڑے تے چین دے اصولی موقف اتے بنیادی مسائل تے پاکستان دی حمایت تے چین دا تہہ دل نال شکریہ ادا کیتے۔ انہاں سارے شعبیں اچ آپݨے تعاون کوں ودھاوݨ تے اتفاق کیتے تاں جو علاقائی امن، خوشحالی اتے استحکام اچ اپݨا کردار ادا کرݨ دے نال نال آپݨے ملک دے لوکاں کوں فیدہ پڄاوݨ دے مشترکہ مقاصد کوں حاصل کیتا ونڄ سڳے ۔
