اسلام آباد۔27اپریل (اے پی پی):وزیراعظم محمد شہباز شریف قومی اسمبلی توں اعتماد دا ووٹ گھن ڳھدا ، قومی اسمبلی دے 180 ارکان وزیراعظم تے اعتماد کیتے۔ قومی اسمبلی دا اجلاس سپیکر راجہ پرویز اشرف دی صدارت اچ شروع تھیا ۔ اجلاس دے آغاز اچ وزیر خارجہ بلاول بھٹو زرداری آکھیے پورے ملک اچ پارلیمنٹ بارے سوال اٹھدے پئن ، اساں پوری دنیا کوں ݙساوݨ چاہندوں پارلیمنٹ آئین، جمہوریت اتے اعلیٰ عدلیہ دے چار ترائے دے اکثریتی بنچ نال کھڑی اے ۔ بلاول بھٹو زرداری قرارداد پیش کیتی جو پاکستان دی قومی اسمبلی وزیراعظم محمد شہباز شریف تے مکمل اعتماد کریندی اے ۔ سپیکر راجہ پرویز اشرف قرارداد کوں رائے شماری کیتے ایوان وچ پیش کیتا تاں قومی اسمبلی دے 180 ارکان اپݨی نشستاں تے کھڑے تھی تے وزیراعظم محمد شہباز شریف تے آپݨے اعتماد دا اظہار کیتے۔ سپیکر راجہ پرویز اشرف آکھیے وزیراعظم محمد شہباز شریف تے 180 ارکان اعتماد دا اظہار کیتے ایویں اے قرارداد قومی اسمبلی دی طرفوں منظور تھی چکی اے ۔ سپیکر آکھیے سابق وزیر مذہبی امور مفتی عبدالشکور زندہ ہوندے تاں اڄ ارکان دی تعداد 181 ہوندی ۔واضح رہے جو وزیراعظم دے عہدے تے برقراررہݨ کیتے 172 ارکان دا اعتماد لازم اے ۔
