پیپلز پارٹی ترائے نسلاں تئیں قید و بند دی صعوبتاں برداشت کیتن، جاناں دی نذرانے پیش کیتے پر آئین تے جمہوریت دی بحالی کیتے جدوجہد جاری رکھی، وزیر خارجہ بلاول بھٹو زرداری دا بین الاقوامی کنونشن دے چھیکڑی سیشن توں خطاب

اسلام آباد۔11مئی (اے پی پی) وزیر خارجہ بلاول بھٹو زرداری آکھیا جو ہک فاشسٹ اتے نام نہاد سیاسی جماعت کوں ہر کہیں دی ریڈ لائن پار کرݨ دا موقع ݙتا ڳے، پیپلز پارٹی ترائے نسلاں تئیں قید و بند دی صعوبتاں برداشت کیتن، جاناں دی نذرانے پیش کیتے پر آئین تے جمہوریت دی بحالی کیتے جدوجہد جاری رکھی۔ ہݨ وی ائین اتے جمہوریت دے دفاع کیتے ہر قسم دی قربانی ݙیسوں۔ خمیس کوں قومی اسمبلی اچ آئین پاکستان دی گولڈن جوبلی دی مناسبت نال تھیوݨ آلے بین الاقوامی کنونشن دے چھیکڑی سیشن توں خطاب کریندیں ہوئیں بلاول بھٹو آکھیا جو اے میݙے کیتے اعزاز اے جو میں بین الاقوامی کنونشن برائے دستور نال مخاطب ہم ، اساں پاکستان دے دستور دی گولڈن جوبلی منیندے پیوں، میݙے دوست ملکاں توں آوݨ آلے ملکاں کوں خوش آمدید آکھداں اتے انہاں دا شکریہ اداکرینداں۔ اساݙے دوست سچیندے پئے ہوسن جو ایں ملک اچ آئے جتھ آئین کوں ولا ولا پامال کیتا ڳے، ایں صورتحال اچ کیوں اساں گولڈن جوبلی منیندے پیوں ، جیڑھی مشکلاں اساں ݙٹھن اساں ݙساوݨ چاہندوں جو اساں کیڑے مسئلیاں توں ݙوچار تھیے۔ اساں مارشل لاء اتے ڈکٹیٹر ݙٹھے، اساں پہلے جنرل ضیاء ولا مشرف دا سامݨا کیتا، پاکستان دے جرات مند عوام انہاں آمراں دا مردانہ وار مقابلہ کیتا۔ پیپلز پارٹی ترائے نسلاں تئیں قید و بند دی صعوبتاں برداشت کیتن، جاناں دی نذرانے پیش کیتے پر آئین تے جمہوریت دی بحالی کیتے جدوجہد جاری رکھی۔