آئین دے آرٹیکل 209 دے تحت سپریم جوڈیشل کونسل اچ ریفرنس بھجوایا ونڄے ،وزیر دفاع  دا قومی اسمبلی اجلاس اچ اظہار خیال

اسلام آباد۔15مئی(اے پی پی) وزیر دفاع خواجہ محمد آصف مطالبہ کیتے جو پارلیمنٹ دی کمیٹی بݨا تے ھک بندے دی بے جا حمایت دے واقعات دی چھان بین کیتی ونڄے تے آئین دے آرٹیکل 209 دے تحت سپریم جوڈیشل کونسل اچ ریفرنس بھجوایا ونڄے ،  ویلھا آڳئے جو پارلیمنٹ ایں صورتحال وچ اپݨا آئینی کردار ادا کرے ۔ قومی اسمبلی اچ ڳالھ کریندے ہوئیں انہاں آکھیے ملک دی عدلیہ دی 75 سالہ تاریخ اچ ایجھے واقعات تھئن جنہاں ملک تے گہرے اثرات مرتب کیتے ، انہاں آکھیے عدلیہ دے فیصلیں توں بظاہر سیاسی حمایت نظر آندی پئی اے ݙو ، ترائے دے فیصلے دی کوئی آئینی وقعت کائنی ،  ایندا مقصد عمران خان کوں ریلیف ݙیوݨ اے ، ویلھا آڳئے جو پارلیمنٹ سپریم جوڈیشل کونسل کوں مس کنڈکٹ دا ریفرنس ارسال کرے ۔ آئین تے قانون اساکوں جیڑھا اختیار ݙتے اوندا استعمال کیتا ونڄے۔ 63 اے کوں ری رائٹ کرتے آئین دی ہیئت ہی بدل ݙتی ڳئی ۔ کور کمانڈر دے گھر حملہ تے شہدا دی یادگاراں دی بے حرمتی کرݨ آلیں کوں تحفظ ݙتا ویندا پئے ۔ قائد اعظم دے گھر تے حملہ کیتا ڳئے ، ۔ اے آکھیا ڳئے جو میکوں تساکوں ݙیکھ تے خوشی تھئی اے ۔ انہاں آکھیے ھک قاضی جݙاں ھک مجرم کوں ݙیکھ تے کھڑے تھئے تاں حضرت عمر فاروق رضی اللہ تعالی انہاں کوں ڈی ٹوٹیفائی کرݙتا ہئی ۔ میݙا مطالبہ اے جو پارلیمنٹ سپریم جوڈیشل کونسل کوں ریفرنس بھجواوے ۔