نگران وزیر اعلی دی صدارت اچ اہم اجلاس، 9مئی دے دہشت گردی واقعات دے ذمہ واراں دے خلاف قانونی کارروائیاں دا جائزہ

لاہور۔16مئی(اے پی پی) نگران وزیر اعلی پنجاب محسن نقوی دی صدارت اچ وزیراعلی آفس اچ اہم اجلاس منعقد تھیا جیں اچ صوبے اچ امن وامان دی صورتحال تے 9مئی دے دہشت گردی دے واقعات دے ذمہ واراں دے خلاف قانونی کارروائیاں دا جائزہ ڳھدا ڳئے ۔ اجلاس اچ آرمی تنصیبات اتے املاک تے حملہ کرݨ آلے شرپسنداں دے خلاف آرمی ایکٹ دے تحت کاروائی دے فیصلے دی منظوری ݙتی ڳئی۔اجلاس اچ پنجاب اچ شرپسنداں دے خلاف مقدمات کیتے جوائنٹ انویسٹی گیشن ٹیم تشکیل ݙیوݨ دی وی اصولی منظوری ݙتی ڳئی ۔ نگران وزیراعلی محسن نقوی 9 مئی دے واقعات اچ ملوث لوکاں دی گرفتاری وختی یقینی بݨاوݨ دا حکم ݙتا  ۔ اجلاس اچ دہشت گردی دے واقعات دے اصل ذمہ واراں دی شناخت کیتے سارے سکیورٹی اداریں دے سانجھے اشتراک تے زور ݙتا ڳئے ۔ نگران وزیراعلی محسن نقوی ملزماں،سہولت کاراں اتے ماسٹر مائنڈزتئیں پڄݨ کیتے موثر میکانزم وضع کرݨ دی ہدایت کیتی ۔ انہاں آکھیے تصویراں تے ویڈیوز اچ چہریں دی شناخت کیتے نادرا دے ڈیٹا بیس توں مدد ڳھدی ویندی پئی اے ۔ چیف سیکرٹری، انسپکٹر جنرل پولیس، ایڈیشنل چیف سیکرٹری، ایڈیشنل آئی جی سپیشل برانچ، سی سی پی او لاہور،ایڈیشنل چیف سیکرٹری داخلہ، سیکرٹری قانون، سیکرٹری پبلک پراسیکیوشن، کمشنر لاہورڈویژن اتے متعلقہ حکام اجلاس اچ شرکت کیتی جݙاں جو سارے ڈویژنل کمشنرز اتے آرپی اوز ویڈیولنک دے ذریعے اجلاس اچ شریک تھئے۔