اسلام آباد۔16مئی(اے پی پی) پاک فضائیہ دا دستہ ترکی دے شہر قونیہ اچ منعقدہ بین الاقوامی فلائٹ ٹیکٹیکل مشق اناطولین ایگل 2023 اچ کامیاب شرکت دے بعد پی اے ایف دے آپریشنل ایئر بیس تے واپس پڄ ڳئے ۔ منڳل کوں پی اے ایف دی طرفوں جاری بیان موجب پاک فضائیہ دے ڈپٹی چیف آف دی ایئر سٹاف (پروجیکٹس) ایئر مارشل عرفان احمد مشق دی اختتامی تقریب کوں ݙٹھا تے مشق کوں کامیاب بݨاوݨ تے پاک فضائیہ دے دستے دیاں کاوشاں دی تعریف کیتی ، انہاں ایں اہم مشق دے چنڳے طریقے تے پیشہ ورانہ انعقاد تے پی اے ایف دے فضائی اتے زمینی عملے دی وی تعریف کیتی جیں دا مقصد حقیقت پسندانہ عصری فضائی جنگی حالات دے پیش نظر سانجھے تعاون کوں ودھارا ݙیوݨا ہئی ۔ کمبیٹ کریودے نال ڳالھ مہاڑ کریندے ہوئیں انہاں آکھیے ، ’’موجودہ عالمی سلامتی دا منظر نامہ اتے فضائی جنگ دی ابھردی ہوئی حرکات دے تناظراچ پاکستان تے دوست ملکاں دے درمیان بہتر شراکت داری ضروری اے۔ سلامتی دے ماحول اچ ودھدی پیچیدگی نال بین الاقوامی اتےعلاقائی تذویراتی صورتحال گہری تبدیلیاں توں گزردی پئی اے تے ایں طرح دیاں مشقاں مشترکہ چیلنجاں دے مقابلے اچ سانجھے تعاون کوں ودھاوݨ دا موقع ݙیندن ۔ڈپٹی چیف آف دی ایئر اسٹاف (پروجیکٹس) ھک ٻئے کامیاب بین الاقوامی فضائی مشق دے اختتام تے ترک فضائیہ کوں مبارخ ݙتی ۔
