نومئی دے واقعات دی تاریخ اچ مثال نی ملدی جݙاں جو شہداء دی تحقیر کیتی ڳئی ، فوجی تنصیبات تے حملے کیتے ڳئے، وزیر دفاع خواجہ محمد آصف

اسلام آباد۔24مئی(اے پی پی) وزیر دفاع خواجہ محمد آصف آکھیے 9 مئی دے واقعات دی پاکستان دی 75سالہ تاریخ اچ مثال نی ملدی جݙاں جو شہداء دی تحقیر کیتی ڳئی ، فوجی تنصیبات تے حملے کیتے ڳئن ایندے پچھوں منصوبہ بندی تے گھنائونے مقاصد ہن ،پرتشدد واقعات تے فوجی تنصیبات تے حملیں تے پاکستان تحریک انصاف تے پابندی دا جائزہ گھندے پیوں، عمران خان فوج کوں اپݨا حریف تصور کرڳھدے ،گرفتار ملزمان ݙسیندے پن جو انہاں منصوبیں دی پہلے توں منصوبہ بندی ہئی،عمران خان دے چاتے ڳئے اقدامات توں بھارت اچ خوشیاں منائیاں ڳن ۔ اسلام آباد اچ میڈیا نال ڳالھ مہاڑ کریندے ہوئیں انہاں آکھیے 9مئی دے واقعات  دے جیڑھے شواہد سامݨے آئن ایں توں واضح تھیندے جو اے سارا کجھ ھک منصوبہ بندی دے تحت کیتا ڳئے ، انہاں اپݨے لوک ایندی تصدیق کریندے پئن ایندی منصوبہ بندی ھک سال توں تھیندی پئی ہئی تے ٻہوں سارے شواہد سامݨے آئے اتے انہاں دے آپݨے لوکاں اعتراف کیتے جو عمران خان کئی واری بریف کیتے جے انہاں کوں گرفتار کیتا ویندے تاں ول ردعمل اچ اے سارا کجھ کرݨا اے ، اے انہاں دا آخری حربہ ہئی ،ایجھے عزائم ہندوستان دے تاں تھی سڳدن کہیں پاکستانی دے نی ، عمران خان دے انہاں اقدامات تے بھارت اچ جشن منایا ڳئے تے اے آکھیا ڳئے جو دے ساݙے مفادات کوں اڳو ودھاݨ دی کاوش اے ، ماضی اچ مسلم لیگ (ن) اتے پیپلزپارٹی دے وی اختلافات رہیے لیکن کݙاہیں وی ایں طرح دی انتہا پسندی یا فوج کوں نشانہ نی بݨایا ڳیا ، عمران خان اپݨے اقتدار دے جنگ اچ فوج کوں فریق بݨیندے پئن ۔انہاں آکھیے 9مئی کوں گھنائونے مقاصد دے تحت کورکمانڈر دے گھر حملہ کیتا ڳئے ، پشاور اچ ریڈیو پاکستان دی عمارت ساڑی ڳئی ، شہداء دی یادگاراں تے فوجی تنصیبات کوں نشانہ بݨایا ڳئے، اے سارا کجھ منصوبہ بندی نال کیتا ڳئے ۔ انہاں آکھیے اپݨی افواج کوں نشانہ بݨاوݨ تے قوم دے قابل فخر سپوتاں تے شہداء دی تحقیر تے تحریک انصاف دے خلاف پابندی دا جائزہ گھندے پیوں ایندا فیصلہ حالی کائنی تھیا ۔تحریک انصاف تے پابندی دے حوالے نال پارلیمنٹ کوں اعتماد اچ ڳھدا ویسی ۔ ماضی اچ کݙاہیں ایں طرح ریاست دی رٹ کوں چیلنج نی کیتا ڳیا ، عمران خان ریاستی رٹ چیلنج کیتی،عمران خان محسن کش انسان اے،عسکری تنصیبات تے حملہ عمران خان دا آخری حربہ ہئی ،انہاں لوکاں ریاست دی دفاعی اتے نظریاتی اساس تے حملہ کیتے ، کیڑھا ایجھا جرم اے جیڑھا 9مئی کوں کائنی تھیا ، گوجرانوالہ اچ 5 بندے جاں بحق تھئن ، سیالکوٹ اچ کینٹ اچ داخل تھیوݨ دی کوشش کیتی ڳئی ، آئی ایس آئی دے دفاتر تے حملے کیتے ڳئن ، کرنل شیر خان شہید دی قربانیاں دی تحقیر کیتی ڳئی ۔ ھک سوال دے جواب اچ انہاں آکھیے عمران خان دی ساری سیاست فوج دی گود اچ پروان چڑھی ، اڄ انہاں فوج کوں آپݨا حریف سمجھ ڳھدے ، لوکاں کوں فوجی تنصیبات تئیں پڄاوݨ اچ سہولت کاری کیتی ڳئی ۔ عمران خان  اڄ تئیں واضح الفاظ اچ انہاں واقعات دی مذمت نی کیتی او آکھدے پئن جو او تاں گرفتار ہن انہاں کنے فون دی سہولت موجود ہئی تے او ویڈیو جاری کریندے پئے ہن جنہاں اچ او اے تڑیاں ݙیندے پئے ہن جے انہاں کوں ول گرفتار کیتا ڳیا تاں ردعمل ایندے توں شدید تھیسی ۔