ریاست تے حملہ کرݨ آلیں کوں سزا ݙتی ویندی اے ، مذاکرات نی کیتے ویندے ،عمران خان صاحب اے مذاکرات دی نی این آر او دی اپیل اے ،  مریم اورنگزیب

اسلام آباد۔27مئی  (اے پی پی):وفاقی وزیر اطلاعات ونشریات مریم اورنگزیب آکھیے ریاست تے حملہ کرݨ آلیں کوں سزا ݙتی ویندی اے ، مذاکرات نی کیتے ویندے ،عمران خان صاحب اے مذاکرات دی نی این آر او دی اپیل اے۔  آپݨے ھک بیان اچ انہاں آکھیے 60 ارب  روپے دا ڈاکہ مارݨ آلے فارن ایجنٹ توشہ خانہ چور نال مذاکرات نی بلکہ قانون دی کچاری اچ گھن آیا ویندے ۔ انہاں آکھیے جی ایچ کیو، قومی عمارات  اتے فخر دی علامات تے حملے کرݨ آلیں نال مذاکرات نی تھیندے ۔  شہدا دی یادگاراں دی بے حرمتی کرݨ آلیں نال مذاکرات کرݨ شہدا دی بے حرمتی اے ۔ مریم اورنگزیب آکھیے ایمبولسنز، ہسپتال، سکول ساڑ تے ،ملک اچ فساد، بھن تروڑ تے انتشار کھنڈا تے نوجواناں دے ذہناں اچ زہر پاتے ہݨ آکھدو مذاکرات کرݨے ہن ؟ ،قوم، وطن اتے شہدا دے مجرماں، دہشت گرداں دے سرغنہ نال مذاکرات نی تھیندے ۔ انہاں آکھیے ریت وانڳوں جماعت وکھرݨ دے بعد مذاکرات یاد آ ڳن؟ انہاں آکھیے جہازاں اچ بھر تے لوکاں کوں پٹے پوا پوا تے پی ٹی آئی بݨی ہئی ،جیڑھیاں جماعتاں سیاسی کائنی ہوندیاں ، او ایویں ہی وکھر ویندن ، انہاں آکھیے محمد نوازشریف، محمد شہباز شریف، حمزہ شہباز، مریم نواز سودھے پوری قیادت سینکڑاں ݙینھ جیلاں تے عقوبت خانیں اچ گزاریے، کوڑے مقدمے دا سامݨا کیتا ، ڈٹ تے کھڑے تھئے تے اللہ تعالیٰ سرخرو کیتا۔ انہاں  سوال کیتے جو تساں معیشت تے مذاکرات نہ کیتے ہݨ کیوں؟ تساں کشمیر، سکیورٹی جیہے قومی امور تے ڳالھ نہ کیتی ہݨ کیوں ؟ تساں کورونا دے مسئلے تے رل نہ ٻیٹھے ہݨ کیوں ؟تساں فیٹف دے مسئلے تے مذاکرات نہ کیتے ہݨ کیوں ؟ وزیر اطلاعات و نشریات آکھیے ملک اچ بھاہ لاوݨ ، انتشار کھنڈاوݨ ، ذہناں اچ نفرت دی بھاہ بھر تے مسلح جتھے بݨاوݨ آلے نال ڳالھ نی تھی سڳدی ۔