پاکستان چین اتے یواے ای نال اپݨے تعلقات کوں قدر نال ݙیکھدے، وزیرخزانہ اسحاق ڈار دی چین دی ناظم الاموراتے متحدہ عرب امارات دے سفیر نال ڳالھ مہاڑ

اسلام آباد۔1جون  (اے پی پی) وزیرخزانہ سینیٹرمحمداسحاق ڈار آکھیا جو   پاکستان دے عوامی جمہوریہ چین اتےمتحدہ عرب امارات نال برادرانہ تعلقات ہن، پاکستان چین اتے یواے ای نال اپݨے تعلقات کوں قدر نال ݙیکھدے۔ اے ڳالھیں انہاں خمیس کوں پاکستان اچ چینی سفارتخانہ دی قائم مقام ناظم الامورباؤ زونگ اتے متحدہ عرب امارات دے سفیر   حماد عبید ابراہیم  سلیمالزابی نال ملاقات کریندیں ہوئیں آکھی۔ چین دی قائم مقام ناظم الامورنال ملاقات اچ وزیرخزانہ پاکستان اتے چین وچال ڳھاٹے، پراݨے اتے ݙوپاسہ تعلقات تے روشنی پاتی اتے مختلف شعبیاں اچ چین دی حمایت اتے تعاون دی تعریف کیتی۔ انہاں چین دی قائمقام ناظم الامور کوں ملک دی معاشی صورتحال اتے آئی ایم ایف دے جاری پروگرام دی پیشرفت بارے وی ݙسیا۔ چین دی قائم مقام ناظم الامور ݙوہیں ملکاں وچال مضبوط اتے پراݨے تعلقات دا حوالہ ݙیندیں ہوئیں چینی حکومت ولوں پاکستانی عوام کوں معاشی اتے سیاسی حوالے بارے حمایت دا یقین ݙوایا۔  متحدہ عرب امارات دے سفیرنال ملاقات اچ ݙوہیں ملکاں وچال برادرانہ تعلقات بارے ڳالھ تھئی۔ متحدہ عرب امارات دے سفیر پاکستان دی معیشت دے مختلف شعبیاں اچ سرمایہ کاری کوں ودھاوݨ کیتے متحدہ عرب امارات دی حکومت دی دلچسپی دا اظہار کیتا۔