آندے بجٹ اچ پی ایس ڈی پی اچ نینگراں دی ترقی کیتے خصوصی طور تے رقم مختص کیتی ونڄے ،نینگراں کوں اعلی تعلیم، پیشہ ورانہ تربیت اتے باوقار روزگار دے مواقع ݙیوݨ کیتے اقدامات شامل کیتے ونڄن ، وزیراعظم دی ہدایت

اسلام آباد۔2جون(اے پی پی) وزیراعظم محمد شہبازشریف ہدایت کیتی جو آندے بجٹ اچ پی ایس ڈی پی اچ نینگراں دی ترقی کیتے خصوصی طور تے رقم مختص کیتی ونڄے ،نینگراں کوں اعلی تعلیم، پیشہ ورانہ تربیت اتے باوقار روزگار دے مواقع ݙیوݨ کیتے اقدامات شامل کیتے ونڄن ،نینگراں دی اعلی تعلیم کیتے پاکستان اینڈؤمنٹ فنڈ قائم کیتا ونڄے ۔ وزیراعظم آفس دےمیڈیا ونگ توں جاری بیان موجب اے ہدایات وزیراعظم اپݨی زیر صدارت  پبلک سیکٹر ڈویلپمنٹ پروگرام دے حوالے نال بجٹ تجاویز تے منعقدہ اعلی سطحی اجلاس اچ ݙتی اے ۔ اجلاس اچ وفاقی وزراء اسحاق ڈار، خواجہ محمد آصف، احسن اقبال، رانا ثناء اللہ، رانا تنویر حسین، مشیر وزیرِ اعظم احد خان چیمہ، معاونین خصوصی ملک احمد خان، عطاء اللہ تارڑ، جہانزیب خان اتے متعلقہ اعلی حکام شرکت کیتی۔ وزیراعظم ہدایت کیتی جو آندے بجٹ اچ پی ایس ڈی پی دے تحت  نینگراں دی ترقی کیتے خصوصی طور تے رقم مختص کیتی ونڄے ۔ آندے بجٹ اچ نینگراں کوں اعلی تعلیم، پیشہ ورانہ تربیت اتے باوقار روزگار دے مواقع ݙیوݨ کیتے اقدامات شامل کیتے ونڄن ۔بجٹ اچ باصلاحیت اتے حسن کارکردگی دے حامل طلبا اتے طالبات کوں آئی ٹی دے ہنر توں لیس کرݨ کیتے مفت لیپ ٹاپس دا پروگرام شامل کیتا ونڄے ۔ وزیرِ اعظم  ہدایت کیتی جو اینڈومنٹ فنڈ توں نینگراں کوں اعلی و پیشہ ورانہ تعلیم اتے آئی ٹی اچ مہارت دی تربیت ݙتی ویسی ۔ وظائف و تعلیم کیتے شفافیت اتے میرٹ دے عنصر کوں کلیدی اہمیت ݙتی ویسی ۔ بجٹ اچ آئی ٹی دے ودھارے کیتے منصوبے شامل کیتے ونڄن ۔کسان پیکیج دے تحت شروع کیتے ڳئے منصوبے جاری رکھیے ونڄن۔ بجٹ اچ قابل تجدید توانائی دے منصوبے شامل کیتے ونڄن ۔ پن بجلی دے منصوبیں تے توانائی دے شعبے دی جدت کیتے بجٹ اچ خصوصی رقم مختص کیتی ونڄے ۔ ایجھے منصوبے جیڑھے سست روی دا شکار تھی تے سالہا سال توں پی ایس ڈی پی اچ شامل ہن تے آپݨی اہمیت ونڄا چکن انہاں کوں دائرہ کار توں کڈھیا ونڄے ۔ بجٹ اچ ترقیاتی منصوبیں کوں رلیندے ویلھے صوبیں، متعلقہ شعبے دے سٹیک ہولڈرز اتے اتحادی جماعتاں کوں مکمل اعتماد اچ گھن تے انہاں دی تجاویز کوں رلایا ونڄے ۔ اجلاس کوں پی ایس ڈی پی دے تحت جاری منصوبیں تے پیش رفت اتے آندے مالی سال کیتے منصوبیں دے حوالے نال تجاویز بارے تفصیلی طور تے ݙسایا ڳیا۔ اجلاس کوں ݙسایا ڳئے جو وزیرِ اعظم دی ہدایت تے بجٹ اچ زرعی شعبے، قابل تجدید توانائی، نینگراں کیتے اعلی تعلیم، پیشہ ورانہ تربیت اتے روزگار دے منصوبے ترقیاتی بجٹ دا اہم حصہ ہوسن ۔اجلاس کوں مزید ݙسایا ڳئے جو آئی ٹی شعبے دی ترقی اتے برآمدات ودھاوݨ کیتے وی منصوبے بجٹ دا حصہ ہوسن۔ایں توں انڄ اجلاس کوں ݙسایا ڳئے جو گزریل مالی سال وزیرِ اعظم دے کسان پیکیج اتے با اختیار نوجوان پروگرام دے ثمرات عوام تئیں پڄائے ڳئن ، ایں حوالے نال 60 ہزار نینرگاں دی ایں ویلھے مختلف سرکاری ترقیاتی منصوبیں اچ انٹرنشپ ݙتی ویندی پئی اے جݙاں جو کݨک دی گزریل ݙاہ سال دی نسبت ریکارڈ پیداوار حاصل تھئی ۔ وزیرِ اعظم بجٹ 24 ۔ 2023 دے ترقیاتی منصوبیں اچ ملکی درآمدات دا متبادل ݙیوݨ ، برآمدات ودھاوݨ تے مختلف شعبیں دی جدت دے منصوبیں کوں ترجیح ݙیوݨ دی واضح ہدایات جاری کیتن۔