طورخم اچ پاک۔افغان سرحد بند تھیوݨ بارے افغان وزارت خارجہ دا بیان حیران کن اے، عبوری افغان حکام طورخم سرحد کوں عارضی بند تھیوݨ دا چنڳی طرح پتہ اے، ترجمان دفتر خارجہ

اسلام آباد۔11ستمبر  (اے پی پی) پاکستان افغان وزارت خارجہ ولوں طورخم اچ پاک افغان سرحد بند تھیوݨ بارے افغان وزارت خارجہ دا بیان حیران کن آکھدیں ہوئیں آکھیا جو عبوری افغان حکام طورخم سرحد کوں عارضی بند تھیوݨ دا چنڳی طرح پتہ اے۔ ترجمان دفتر خارجہ ممتاز زہرا بلوچ سنوار کوں ہک بیان اچ آکھیا جو پاکستان آپݨی سرزمین اندر عبوری افغان حکومت ولوں کہیں وی ڈھانچے دی تعمیر کوں قبول نی کر سڳدا کیونجو اے اوندی خودمختاری دی خلاف ورزی اے۔ ترجمان آکھیا جو چھی ستمبر کوں افغان فوجیاں کوں اوں ویلھے غیر قانونی ڈھانچے کوں کھڑا کرݨ توں روکیا ڳئیا تاں انہاں پرامن حل دی بجائے بلااشتعال فائرنگ کیتی۔ پاکستانی فوجی چوکیاں کوں نشانہ ٻݨایا، طورخم بارڈر ٹرمینل دے بنیادی ڈھانچے دا ضیان کرݨ اتے پاکستانی اتے افغان شہریاں دی جاناں کوں خطرے اچ پا ݙتے۔ ترجمان آکھیا جو پاکستانی سرحدی چوکیاں تے ایجھی بلااشتعال اتے اندھادھند فائرنگ کوں کہیں صورت جائز نی آکھیا ونڄ سڳدا۔ افغان بارڈر سکیورٹی فورسز دی بلا اشتعال فائرنگ نال دہشت گرداں دی حوصلہ افزائی تھیندی اے۔ انہاں لوکاں دی افغانستان اندر پناہ گاہیں ہن جئیں دی تصدیق اقوام متحدہ دی سلامتی کونسل دی تجزیاتی معاونت اتے پابندیاں دی نگرانی کرݨ آلی ٹیم آپݨی اڄوکی رپورٹ اچ کیتی اے۔ اساݙی ہمیش توں خواہش اے جو افغانستان نال سرحد ݙوہیں ملکاں وچال امن تے دوستی دی سرحد ہووے، اساں کئی ڈھاکیاں توں آپݨے افغان بھراواں اتے ٻھیݨیں دی کھلے دل نال میزبانی کیتی اے۔ طورخم اچ پاک۔افغان سرحد بند تھیوݨ بارے افغان وزارت خارجہ دا بیان حیران کن اے، عبوری افغان حکام طورخم سرحد کوں عارضی بند تھیوݨ دا چنڳی طرح پتہ اے۔