نگراں وزیراعظم انوار الحق کاکڑ نال مسیحی برادری دے وفد دی ملاقات

اسلام آباد۔11ستمبر(اے پی پی)نگراں وزیراعظم انوار الحق کاکڑ آکھیے جو ہک ٻئے دے احترام نال ہی پر امن اتے خوشحال  معاشرہ ٻݨ سڳدے، جڑانوالہ واقعہ دے ذمہ داراں کوں نشان عبرت ٻݨیسوں جو اینڄھے واقعات ولا نا تھیون۔ اے ڳالھ انہاں اسلام آباد اچ مسیحی برادری دے وفد نال ملݨ ویلھے آکھی۔ نگراں وزیراعظم آکھیا جو ساری ریاستی مشینری اقلیتاں دے حقوق اتے انہاں دے تحفظ کیتے پرعزم اے جو ملک اچ اقلیتاں کوں سٻھے حق ملیے ہوئن، اقلیتی برادری دے مسلے حل کریسوں۔ انہاں آکھیا جو انتہا پسندی مکاوݨ کیتے سارے طبقات کوں اپݨا کردار ادا کرݨا ہوسی، اقلیتی برادری دا پاکستان دی ترقی اچ وݙا کردار اے۔ انہاں اقلیتی برادری دے خالد جارج کوں نگراں وفاقی وزیر انسانی حقوق ٻݨݨ تے مبارک ݙتی۔ وفد اچ سابق صوبائی وزیر براے انسانی حقوق پنجاب اعجاز آگسٹن ، سابق رکن قومی اسمبلی آسیہ انصر، بشپ اندریاس، بشپ سیموئیل ازرایا، بشپ جوزف ارشاد، بشپ ہمفرے پیٹرز، پاسٹر ہنوک حشمت، پاسٹر اولیور ضیاء شامل ہن۔