پاکستان خودمختار مملکت دی حیثیت نال آپݨے قومی فیدے کیتے فیصلے کریندے، کہیں کوں آپݨے معاملیاں اچ مداخلت کائنا کرݨ ݙیسوں، انتخابی عمل شفاف اتے آزادانہ ہوسی۔ نگران وزیراعظم انوار الحق کاکڑ

اسلام آباد۔26ستمبر  (اے پی پی) نگران وزیراعظم انوار الحق کاکڑ آکھیا جو پاکستان  خودمختار مملکت دی حیثیت نال آپݨے قومی فیدے کیتے فیصلے کریندے، کہیں کوں آپݨے معاملیاں اچ مداخلت کائنا کرݨ ݙیسوں، انتخابی عمل شفاف اتے آزادانہ ہوسی۔ اساں جلدی انتخابی عمل اچ ویندے پیوں۔ انتخابی عمل اچ انتظامی سطح تے کہیں دی حمایت یا مخالفت کائنا کیتی ویسی۔ افغانستان اچ استحکام ݙوہیں ملکاں دے فیدے اچ اے۔  تحریک طالبان پاکستان سودھے ٻئے گروپاں دی پاکستان دے خلاف افغان سرزمین دے خلاف استعمال تے تشویش اے۔ افغان عبوری حکومت آپݨی سرزمین کہیں ملک دے خلاف استعمال نہ تھیوݨ ݙیوے۔ ترک  ٹی  وی “ٹی آر ٹی” کوں  انٹرویو اچ نگران وزیراعظم انوار الحق کاکڑ ہک سوال دے ولدے اچ آکھیا جو اساں تحریک انصاف ، مسلم لیگ (ن) یاپیپلزپارٹی سودھی کہیں سیاسی جماعت دے سیاسی حقوق دے تحفظ کوں یقینی ٻݨیسوں۔ ہک سوال دے ولدے اچ انہاں آکھیا جو انتخابی حلقہ بندیاں الیکشن کمیشن دی آئینی ذمہ واری اے۔ اگر اساں قانون دی بالادستی دی ڳالھ کریندوں تاں اساکوں ایں تے عمل وی کرݨا پوسی۔ انتخابی حلقہ بندیاں تے اعتراض سابق پارلیمنٹ اچ قانون سازی ویلھے کیتا ونڄ سڳدا ہئی۔ اساکوں قانون اتے آئین دی پاسداری کرݨی اے۔ ہک سوال دے ولدے اچ انہاں آکھیا جو پاکستان سودھے ہر ملک دے سیاسی کلچر اچ سازشی تھیوریاں گردش کریندی پئی ہوندن۔ عمران خان دی حکومت کوں ہٹاوݨ بارے مداخلت دے الزامات دی خود امریکا ݙوٹوک تردید کیتی اے۔ پاکستان  خودمختار مملکت دی حیثیت نال آپݨے قومی فیدے کیتے فیصلے کریندے، کہیں کوں آپݨے معاملیاں اچ مداخلت کائنا کرݨ ݙیسوں، انتخابی عمل شفاف اتے آزادانہ ہوسی۔