ملک دی ترقی تے استحکام اتے امن کیتے ھک ݙوجھے نال تعاون کوں ودھاوݨا ہوسی ، پاک فوج خیبرپختونخوا دی ترقی اتے استحکام کوں یقینی بݨاوݨ کیتے آپݨا بھرپور کردار ادا کریندی رہسی ، چیف آف آرمی سٹاف جنرل سیّد عاصم منیر دا دورہ پشاور

راولپنڈی۔27ستمبر(اے پی پی):چیف آف آرمی سٹاف جنرل سیّد عاصم منیر آکھیے اساکوں آپݨے ملک دی ترقی و استحکام اتے امن کیتے ھک ݙوجھے نال تعاون ودھاوݨا ہوسی ، پاک فوج خیبرپختونخوا دی ترقی اتے استحکام کوں یقینی بݨاوݨ کیتے اپݨا بھرپور کردار ادا کریندی رہسی تاں جو معاشی ترقی دی رفتار کوں ودھایا ونڄ سڳے۔ آرمی چیف ٻدھ کوں آپݨے دورہ پشاور اچ تریمتاں سمپوزیم تے صوبائی ایپکس کمیٹی دے اجلاس اچ شرکت کیتی۔ پاک فوج دے شعبہ تعلقات عامہ موجب آرمی چیف تریمتاں سمپوزیم توں خطاب کریندے ہوئیں آکھیے پاکستان دی تاریخ اچ تریمتاں ملکی ترقی اچ مثبت اتے اہم کردار ادا کیتے، ملکی ترقی اچ تریمتاں دا کردار نہایت اہمیت رکھیندے ۔ انہاں آکھیے خیبرپختونخوا دی تریمتاں دہشتگردی دے خلاف طویل جنگ پاروں بے شمار چیلنجز دا سامݨا کیتے تے انہاں سارے چیلنجز دے باوجود پختہ عزم اتے بہادری دا ثبوت ݙتے۔ آرمی چیف تریمتاں دی حوصلہ افزائی کریندے ہوئیں آکھیے جو او خیبرپختونخوا اتے نویں ضم شدہ ضلعیں دی ترقی اچ ودھ توں ودھ حصہ گھنن تے ایں تبدیلی دا پورا پورا فیدہ چاتا ونڄ سڳے ۔ ایں توں انڄ آرمی چیف صوبائی ایپکس کمیٹی دے اجلاس اچ وی شرکت کیتی۔اجلاس اچ نگراں وزیر اعلیٰ خیبرپختونخوا محمد اعظم خان وی شریک تھئن ۔ ایں موقع تے آرمی چیف کوں سمگلنگ، ذخیرہ اندوزی اتے منشیات دی سمگلنگ دے خلاف اقدامات سودھے مجموعی سکیورٹی صورتحال بارے بریفنگ ݙتی ڳئی ۔ صوبائی ایپکس کمیٹی دے شرکا ء ایں ڳالھ دا اعادہ کیتے جو ریاستی ادارے عوام دے جان و مال دے تحفظ کیتے متحد ہن۔ اجلاس دے شرکاء شہداء کوں وی زبردست خراج عقیدت پیش کیتے۔ اجلاس توں خطاب کریندے ہوئیں آرمی چیف آکھیے اساکوں اپݨے ملک دی ترقی و استحکام اتے امن کیتے ھک ݙوجھے نال تعاون کوں ودھاوݨا ہوسی، ملک اچ امن اتے خوشحالی کیتے اپݨی کوششاں کوں ہم آہنگ کرݨا ہوسی۔ انہاں آکھیے پاک فوج خیبرپختونخوا دی ترقی اتے استحکام کوں یقینی بݨاوݨ کیتے اپݨا بھرپور کردار ادا کریندی رہسی تاں جو معاشی ترقی دی رفتار کوں ودھایا ونڄ سڳے ۔ ایندے توں پہلے آرمی چیف دی پشاور آمد تے کور کمانڈر پشاور انہاں دا استقبال کیتا۔