ماضی دیاں غلطیاں کوں بھلا تے مستقبل آلے پاسے ݙیکھݨا ہوسی، جھیڑیں توں بچݨ پاکستان دے مفاد وچ اے ، نگران وفاقی وزیر اطلاعات مرتضیٰ سولنگی

اسلام آباد۔5اکتوبر(اے پی پی) نگران وفاقی وزیر اطلاعات و نشریات مرتضیٰ سولنگی آکھیے اساں ترقی پسند، جمہوری اتے پرامن قوم دے طور تے اڳوں ودھݨ چاہندوں ، اساکوں ماضی دیاں غلطیاں کوں بھلا تے مستقبل کوں ݙیکھݨا ہوسی ،جھیڑیں توں بچݨ پاکستان دے مفاد وچ اے ، اساں آپݨے سارے ہمسائیں نال چنڳے تعلقات چاہندوں ۔ اے ڳالھ انہاں جمعرات کوں انسٹی ٹیوٹ آف سٹریٹیجک سٹڈیز اسلام آباد اچ سنٹر فار افغانستان، مڈل ایسٹ اینڈ افریقہ، یونائیٹڈ سٹیٹس انسٹی ٹیوٹ فار پیس (یو ایس آئی پی) دے تعاون نال ”خطے اچ امن، سلامتی اتے ایں توں اڳوں : پاکستان دا کردار“ دے موضوع تے عالمی کانفرنس توں خطاب کریندے ہوئیں آکھی اے ۔ نگران وفاقی وزیر اطلاعات آکھیے اساں ھک ایجھی قوم بݨݨ چاہندوں جیڑھی آپݨے لوکاں دی ݙیکھ بھال کرݨ ڄاݨدی ہووے تے آپݨے عوام دی فلاح و بہبود تے توجہ ݙیوے۔ انہاں آکھیے دنیا دی وݙی طاقتاں وچال جاری محاذ آرائی توں بچݨ پاکستان دے مفاد وچ اے ۔ حکومت اپݨے عوام اتے ملکی معیشت تے توجہ ݙیوݨ چاہندی اے۔ انہاں آکھیے ساݙے چین تے ایران نال تعلقات پہلے ہی چنڳے ہن جݙاں جو اساں آپݨے ٻئے ہمسائیں نال وی چنڳے تعلقات چاہندوں۔ انہاں آکھیے پاکستان دے مشرق وسطیٰ نال تعلقات ٻہوں چنڳے ہن، تیل دی دولت توں مالا مال انہاں ملکاں نال اقتصادی تے تجارتی تعلقات مزید چنڳے بݨاوݨ تے توجہ ݙتی ہوئی اے ۔انہاں آکھیے پاکستان افغانستان نال عملی طور تے چنڳے تعلقات چاہندے ، افغانستان نال تعلقات چنڳے بݨاوݨ سانڳے پاکستان دی مخلصانہ کوششاں دے باوجود ہݨ تئیں مطلوبہ نتجے نی مل سڳیے ۔ انہاں آکھیے بدقسمتی نال ماضی نیڑے اچ ساݙی سرزمین تے 24 خودکش حملے تھئن جنہاں اچوں 14 افغان شہریاں کیتے۔ انہاں آکھیے ٻہوں مسئلیں دے باوجود اساں پڑوسی ملک افغانستان نال تعلقات چنڳے بݨاوݨ چاہندوں۔ نگران وفاقی وزیر اطلاعات آکھیے حکومت پاکستان ہݨے ہی معیشت کوں تکڑا کرݨ ، تجارت ودھاوݨ تے تجارت اتے سرمایہ کاری دے نویں موقع ڳولݨ سانڳے ایس آئی ایف سی دے تحت ٻہوں سارے اقدامات کیتن، ساݙی ساری توجہ معیشت تے تجارت اُتے ہے ۔