نجی شعبہ بریسٹ کینسر توں متاثرہ لوکاں کوں مدد ݙیوݨ اچ آپݨا کردار ادا کرے ، صدر مملکت ڈاکٹر عارف علوی

اسلام آباد۔5اکتوبر(اے پی پی)صدر مملکت ڈاکٹر عارف علوی چھاتی دے کینسر بارے آگاہی ݙیوݨ سانڳے نجی تے سرکاری شعبہ دی سانجھیاں کوششاں تے زور ݙیندے ہوئیں آکھیے جو نجی شعبہ بریسٹ کینسرتوں متاثرہ لوکاں کوں مدد ݙیوݨ اچ آپݨا کردار ادا کرے ،میڈیا اتے ٻئے اسٹیک ہولڈرز چھاتی دے کینسر متعلق آگاہی مہم اچ مددکرن،تریمتاں کوں جان لیوا مرض دی وختی تشخیص ، خود معائنہ کرݨ تے وختی طبی رہنمائی گھنݨ دی ترغیب ݙیوݨی چاہیدی اے ۔ ایوان صدر دے پریس ونگ موجب او خمیس کوں سیمنز ہیلتھائنرز دے وفد نال ملاقات اچ ڳالھ مہاڑ کریندے پئے ہن ۔ صدر مملکت صحت دے شعبے اچ چیلنج نال نبݨ سانڳے ڈیجیٹل ٹیکنالوجیز دے امکان کوں نشابر کریندے ہوئیں ڈیجیٹل ٹیکنالوجی آگاہی ، صحت دی سہولیات تئیں رسائی بہتر بݨاوݨ تے خرچے گھٹ کرݨ اچ معاون ثابت تھی سڳدی اے ۔صدر مملکت ابتدائی اسکریننگ، اپݨا معائنہ خود کرݨ تے بہتر طبی خدمات دی اہمیت تے زور ݙتے تے آکھیے جو نجی شعبے دے شراکت دار میڈیا مہم اتے تعلیمی اداریں اچ ورکشاپاں تے سیمینارز کراوݨ دے ذریعے شعور ݙیوݨ اچ اہم کردار ادا کرسڳدن ۔صدر مملکت اکتوبر اچ چھاتی دے کینسر متعلق آگاہی دے پروگرام کرݨ تے وی زور ݙتا ، انہاں چھاتی دے کینسر آگاہی مہم اچ پاکستان ٹیلی کمیونیکیشن اتھارٹی اتے ٹیلی کام کمپنیاں دے کردار دی وی تعریف کیتی ۔یکم اکتوبر توں چھاتی دے کینسر تے آڈیو آگاہی سنھیا چلایا ویندا پئے جیں اچ تریمتاں کوں اپݨا معائنہ کر متے وختی طبی مشورہ گھنݨ دی تلقین کیتی ویندی پئی اے ۔صدر مملکت آکھیےمیڈیا ہاؤسز مارننگ اتے ٹاک شوز توں علاوہ بیداری سانڳے سنھیے نشر کرن ،چھاتی دے کینسر دے بعد دے مراحلے اچ علاج نال جڑیے خرچے کوں وختی تشخیص نال گھٹ کیتا ونڄ سڳدے ۔